სასურველი და შენზე მორგებული პორშეს შერჩევა ახლა უფრო მარტივია — პორშე ცენტრი თბილისი მომხმარებელს სთავაზობს, გერმანული პრემიუმ ბრენდის ნებისმიერი მოდელი საკუთარი გემოვნებით ქართულ კონფიგურატორში ააწყოს.

ახალი პროგრამის დახმარებით თავად განსაზღვრავთ, რა ტექნიკური ფუნქციები უნდა ჰქონდეს თქვენს ავტომობილს, ირჩევთ ექსტერიერის სტილსა და სასურველ ფერს. თქვენს გადაწყვეტილებაზეა დამოკიდებული, როგორი საბურავის დისკი ექნება მანქანას. სრული თავისუფლება გაქვთ, თქვენ კომფორტს მოარგოთ სალონის დიზაინიც: რა ფერი იქნება ან რა მასალას გამოიყენებთ სავარძლებისათვის.

არჩევანი მრავალფეროვანია და ჯამში 500-მდე ოფციას მოიცავს. მნიშვნელოვანია ისიც, რომ შესაძლებლობა გაქვთ, თვალი ადევნოთ ხარჯებს; კონფიგურატორში ფასები დეტალურად არის მოცემული და საბოლოო შერჩევის შემდეგ თქვენ უკვე ზუსტად იცით, რა დაგიჯდებათ პორშე, რომელიც თავად შექმენით.

"პორშე ცენტრი თბილისი მუდმივად ფეხს უწყობს მსოფლიო ტრენდებს, არ გვეშინია ვიყოთ თამამები ჩვენს გადაწყვეტილებებში და სიახლეებისთვისაც ყოველთვის მზად ვართ", — ამბობს პორშე ცენტრი თბილისის დირექტორი, პეტრე წაქაძე, — "მომხმარებელზე ზრუნვა და მათთვის კომფორტის შექმნა ჩვენი კომპანიის პრიორიტეტია. ვცდილობთ, მომხმარებელი არა მხოლოდ პრემიუმ ავტომობილებით, არამედ მაღალი ხარისხის მომსახურებითაც გავანებივროთ. გვინდა, ჩვენს მომხმარებელს მაქსიმალურად გავუმარტივოთ შეძენის პროცესიც, იქნება ეს ონლაინ კონფიგურაციის არჩევა თუ ავტომობილის სახლის კართად მიყვანა".

პორშე ცენტრი თბილისი გერმანული ბრენდის ოფიციალური წარმომადგენელია საქართველოში და მის სტანდარტებს ზედმიწევნით მიჰყვება. კონფიგურატორიც გერმანულიდან ითარგმნა, დამუშავდა 2 500 გვერდი, რაც საერთო ჯამში 4 500 000 სიმბოლოს მოიცავს.

პორშე ცენტრი თბილისი თეგეტა ჯგუფში შემავალი კომპანიაა, რომელიც ქართულ ბაზარზე 2011 წლიდან ოპერირებს. კომპანია მომხმარებელს პრემიუმ ბრენდის უახლეს ავტომობილებს, ასევე სრულ სადიაგნოსტიკო და სარემონტო მომსახურებას, ორიგინალ ნაწილებსა და აქსესუარებს სთავაზობს.