გაფრთხილება: სტატია Spider-Man: No Way Home-ის სპოილერებს შეიცავს.

Spider-Man: No Way Home-ის პრემიერიდან თვეზე მეტის გასვლის შემდეგ, როგორც იქნა, სამივე სპაიდერმენი — ტობი მაგუაირი, ენდრიუ გარფილდი და ტომ ჰოლანდი საყვარელი სუპერგმირისა და დაუვიწყარი გამოცდილების შესახებ სალაპარაკოდ შეიკრიბნენ. ახალ 30-წუთიან ინტერვიუში სამეულმა საინტერესო კადრს მიღმა ფაქტები და საკუთარი გამოცდილება თუ ემოციები გაგვიზიარეს.

როგორც ალბათ უკვე იცით, მარველის ახალ ფილმში ერთმანეთს ალტერნატიული სამყაროს სპაიდერმენები ხვდებიან — სუპერგმირის ფანებმა ერთ ფილმში ტობი მაგუაირის, ენდრიუ გარფილდისა და ტომ ჰოლანდის პერსონაჟები იხილეს.

როგორც ჩანს, ტომ ჰოლანდისთვისაც ისეთივე ამაღელვებელი ყოფილა წინა სპაიდერმენებთან შეხვედრა, როგორიც ეს მაყურებლისთვის აღმოჩნდა. ტომის თქმით, ენდრიუ და ტობი გუნდს მოგვიანებით შემოურთდნენ, როცა გადაღებები უკვე დიდი ხნის დაწყებული იყო და როგორც ყველა ფანი, მათთან შეხვედრამდე ისიც დღეებს ითვლიდა.

"ჩემს კალენდარში სხვა სპაიდერმენების მოსვლის თარიღი ახლოვდებოდა და რაც უფრო ცოტა დრო რჩებოდა, უფრო ვნერვიულობდი", — აღიარა ტომმა.

რა თქმა უნდა, გასაჭირის დროს სპაიდერმენს ყოველთვის შეუძლია, ემჯეისა და ნედს ენდოს. სწორედ ამიტომ აღელვებულმა ტომმა სპაიდერმენების შეხვედრაზე დასამშვიდებლად ზენდეია და ჯეიკობ ბეტელონი გაიყოლა.

"მათ უნდა შევხვდე და ძალიან ვღელავ. სცენა უნდა გავითამაშოთ და არ ვიცი, როგორ ჩაივლის. ერთსა და იმავე პერსონაჟს განვასახიერებთ და მასში ჩვენი გული და სული უნდა ჩავდოთ. ეს მათთვისაც და ჩემთვისაც ძალიან ბევრს ნიშნავს", — იხსენებს ტომ ჰოლანდი შეხვედრის წინ საკუთარ ფიქრებს, — "ამიტომ ჯეიკობი და ზენდეია პირველ დღეს ჩემთან იყვნენ".

ნერვიულობის მიუხედავად, აშკარაა, რომ სპაიდერმენებმა დავალებას თავი შესანიშნავად გაართვეს და პერსონაჟის გულშემატკივრებს დაუვიწყარი თავგადასავალი აჩუქეს.

იხილეთ ინტერვიუ მთლიანად:

ამავე თემაზე: