ექსპრეზიდენტ მიხეილ სააკაშვილის ადვოკატის, გიორგი მშვენიერაძის განცხადებით, მესამე პრეზიდენტს ევროპული საბჭოს პრეზიდენტ შარლ მიშელისა და ევროკომისიის პრეზიდენტ ურსულა ფონ დერ ლაიენის წერილი გადასცა, სადაც ყურადღება გამახვილებულია მის ჯანმრთელობის მდგომარეობაზე. მშვენიერაძის თქმით, ევროპული საბჭოსა და ევროკომისიის პრეზიდენტები წერილში წერენ, რომ აგრძელებენ მიმდინარე პროცესებზე დაკვირვებას.

"გადავეცი წერილი, რომელიც მას გუშინ გადმოუგზავნეს შარლ მიშელისა და ურსულა ფონ დერ ლაიენის კაბინეტიდან. წერილში განსაკუთრებულ ყურადღებას გამოხატავენ მისი ჯანმრთელობის მდგომარეობის შესახებ, მის მიმართ ვალდებულებებს შეახსენებენ მკაცრად საქართველოს ხელისუფლებას, რომ უზრუნველყოფილი იყოს ყველა ის უფლება, რომელიც ადამიანის უფლებათა კონვენციით განმტკიცებულია ევროპის საბჭოს ქვეყნებისათვის. ამავდროულად, ისინი გააგრძელებენ დაკვირვებას მიმდინარე პროცესების. საუბარია სამართლიანი სასამართლოს უფლების განსაკუთრებულ მნიშვნელობაზე", — განაცხადა მშვენიერაძემ.

ადვოკატის თქმით, მან მიხეილ სააკაშვილს შარლ მიშელისა და ურსულა ფონ დერ ლაიენის წერილი უკვე გადასცა.