ქართული ოცნების თავმჯდომარე, ირაკლი კობახიძე აცხადებს, რომ 5 ივლისს ძალადობრივ კონტრაქციაზე მედიის მიმართ განხორციელებული ძალადობა "სპონტანური იყო და არავინ ელოდა". კობახიძეს არაფერი უთქვამს იმაზე, რატომ ვერ აღკვეთა პოლიციამ ძალადობა მაშინ, როცა ის მთელი დღის განმავლობაში გრძელდებოდა.

"ეს იყო ძალიან მტკივნეული დღე ჩვენთვის, ბუნებრივია, სხვადასხვა მიზეზის გამო და მთავარი მიზეზი არის ის, რომ ჟურნალისტების მიმართ ჰქონდა უპრეცედენტო ძალადობას ადგილი, რაც არ მომხდარა 30 წლის განმავლობაში. ხელისუფლების მხრიდან ეს მომხდარა, თქვენ გახსოვთ 7 ნოემბერი და მსგავსი ფაქტები, მაგრამ ის, რომ ადამიანების გარკვეულ ჯგუფს გამოევლინა ასეთი ძალადობა ჟურნალისტების მიმართ, ასეთი რამ არ მომხდარა და რა თქმა უნდა, ეს იყო ძალიან მტკივნეული დღე.

შეიძლებოდა თუ არა ამის თავიდან აცილება? ეს არის მთავარი საკითხი. ჩვენ ვფიქრობთ და ამაზე არაერთხელ გვისაუბრია, რომ თავისი ობიექტური მიზეზები ჰქონდა ამ ყველაფრის თავიდან ვერ აცილებას, მათ შორის, ერთ-ერთი მთავარი მიზეზი იყო ის, რომ სპონტანური იყო ეს ძალადობა და ძალადობას არავინ ელოდა, ლოგიკურად, იმიტომ, რომ 30 წელია არ მომხდარა ასეთი რამ ჟურნალისტების მიმართ. არავინ არ ელოდა იმ დროს და იმ ადგილზე ძალადობას. მოლოდინები იყო 5 საათთან დაკავშირებით, როცა ე.წ. პრაიდი უნდა გამართულიყო", — განაცხადა მან რუსთავი 2-ის ეთერში.

5-6 ივლისს ჰომოფობიურ და ძალადობრივი ჯგუფების თავდასხმის შედეგად 50-ზე მეტი ადამიანი დაშავდა, მათგან უმრავლესობა მედიის წარმომადგენელია. ძალადობრივი ჯგუფები თავს დაესხნენ თბილისი პრაიდის, სირცხვილიასა და ადამიანის უფლებათა ცენტრის ოფისებსაც. 11 ივლისს, აქციაზე ნაცემი TV პირველის ოპერატორი, ლექსო ლაშქარავა გარდაიცვალა.

5-6 ივლისის ძალადობას წინ უძღოდა ქართული ოცნების ლიდერების განცხადებები იმაზე, რომ ღირსების მარშს მიზანშეწონილად არ მიიჩნევენ. 5 ივლისს, როცა უკვე დაწყებული იყო ძალადობა, ღარიბაშვილმა ისევ თბილისი პრაიდი გააკრიტიკა, რამდენიმე დღეში კი გაიმეორა ჰომოფობიური ჯგუფების გზავნილი პროპაგანდის შესახებ.

ჰომოფობიური და ძალადობრივი კონტრაქციის ორგანიზატორები ამ დრომდე არ დაუკავებიათ.