ტელეკომპანია GDS-ის გადაცემა 20/30-ის ყოფილი წამყვანი, მაკა ცინცაძე საზოგადოებრივი მაუწყებლის თანამშრომელი გახდა. ცინცაძე ახალი სეზონიდან კი საზოგადოებრივ-პოლიტიკური ტოქშოუს წამყვანი გახდება. ამის შესახებ On.ge-ს საზოგადოებრივი მაუწყებლის მიმდინარე და ახალი ამბების ბლოკის დირექტორმა, გიორგი გვიმრაძემ განუცხადა.

"წინა კვირაში გავაფორმეთ მაკასთან [ცინცაძე] ხელშეკრულება და სექტემბრისთვის ვამზადებთ გადაცემას," - აღნიშნა გვიმრაძემ.

ტელეკომპანია GDS-ზე საზოგადოებრივ-პოლიტიკური მიმართულების გაუქმების შემდეგ და საზოგადოებრივ მაუწყებელზე 20/30-ის ყოფილი მთავარი პროდიუსერის, ვასილ მაღლაფერიძის გენერალურ დირექტორად არჩევის შემდეგ, GDS-ის 20-მდე თანამშრომელი საზოგადოებრივ მაუწყებელში დასაქმდა.

საზოგადოებრივი მაუწყებლის თანამშრომლები გახდა 10 ჟურნალისტი, ტექნიკური დირექტორი, ვებგვერდის სამი თანამშრომელი, მათ შორის რედაქტორი და საინფორმაციო პროგრამის ოთხი პროდიუსერი.

არხზე, საინფორმაციო პროგრამების დახურვამდე, GDS საქართველოს ყოფილი პრემიერ-მინისტრისა და საპარლამენტო უმრავლესობაში მყოფი პარტიის, ქართული ოცნების დამფუძნებლის, ბიძინა ივანიშვილის ოჯახის ეკუთვნოდა. ივანიშვილის სურვილით შეიქმნა გადაცემა 20/30-იც, რომლის მიზანიც, მისივე თქმით, "საზოგადოებაში შექმნილი საინფორმაციო ვაკუუმიის" ამოვსება იყო. საწყის ეტაპზე, ივანიშვილი ამ გადაცემის ერთ-ერთი წამყვანიც იყო.

ნიუსის თავდაპირველ ვერსიაში ეწერა, რომ მაკა ცინცაძე პირველ არხზე მოამბეს წაიყვანს, რაც არ იყო ზუსტი. On.ge ბოდიშს უხდის მკითხველს უზუსტობისთვის.