დაავადებათა კონტროლის ცენტრის დირექტორის, ამირან გამყრელიძის განცხადებით, ქვეყანაში ომიკრონით ინფიცირების 1 254 ლაბორატორიულად დადასტურებული შემთხვევაა გამოვლენილი.

"დაახლოებით, ჩვენი მათემატიკური მოდელირებით, 50% ქვეყანაში უკვე დადებითი შემთხვევების არის გამოწვეული ომიკორნით, ხოლო თბილისში, სადაც ყველაზე მეტი შემთხვევების რაოდენობა გვაქვს და ინციდენტობა ყველაზე მაღალი გვაქვს თბილისში, იქ ომიკრონის წილი არის 65%. დანარჩენ რეგიონებში წილი გახლავთ 30-35%-ის ფარგლებში.

ამ თვალსაზრისით, იგივე ინციდენტობის მაჩვენებლით, თბილისს მოსდევს აჭარა, შემდეგ გურია, თუმცა ომიკრონის ცირკულაცია, ასევე, მნიშვნელოვანია, მეორე ადგილზე თბილისის შემდეგ გახლავთ იმერეთი, აჭარა და შიდა ქართლში.

ზოგადად, ომიკრონით ჩვენ ლაბორატორიულად დადასტურებული გვაქვს 1 254 შემთხვევა", — განაცხადა გამყრელიძემ.

18 იანვრის მონაცემებით, საქართველოში კორონავირუსის 7 521 ახალი შემთხვევა დადასტურდა, გამოჯანმრთელდა 3 160, ხოლო გარდაიცვალა — 31 ადამიანი.

ბოლო 24 საათში ქვეყნის მასშტაბით ჩატარდა 56 367 კვლევა ტესტით, მათ შორის ანტიგენის სწრაფი ტესტით — 38 892, ხოლო PCR-ით — 17 475.

Stopcov.ge-ზე გამოქვეყნებული ინფორმაციის თანახმად დადებითობის დღიური მაჩვენებელი არის 13,34%, ბოლო 7 დღის — 10%, ხოლო 14 დღის — 10,26%.