ჯანდაცვის სამინისტრო ეხმაურება თბილისში, ნაძალადევის რაიონში, სანატორიუმ ქართლის შენობაში მცხოვრები დევნილის, ზურაბ ჭიჭოშვილის გარდაცვალებას. ისინი განმარტავენ, რომ ამ შენობაში მცხოვრებ დევნილებს განსახლების ორ გზა შესთავაზეს.

"იძულებით გადაადგილებულ პირებს, თბილისში ბინის მოძიება თავად შეუძლიათ, რომლის შესყიდვასაც სააგენტო უზრუნველყოფს. დევნილ ოჯახებს ასევე აქვთ ალტერნატივა, რომ სააგენტოს მიერ შესყიდული ბინების მშენებლობის დასრულებას დაელოდონ. ამ შემთხვევაში სააგენტო, გამგეობასთან ერთად, მათ ქირის თანხით უზრუნველყოფას სთავაზობს.

საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს გადაწყვეტილებით ყოფილ სანატორიუმ ქართლში მცხოვრები დევნილები ახალ საცხოვრებელ ფართებს 2022 წელს უპირობოდ მიიღებენ", — ვკითხულობთ უწყების მიერ გავრცელებულ განცხადებაში.

16 იანვარს, სანატორიუმ ქართლის შენობასთან დევნილი გარდაიცვალა. ადგილობრივების თქმით, ის სახურავიდან გადმოხტა და თვითმკვლელობის მიზეზი მათი მოთხოვნების შეუსრულებლობაა. შინაგან საქმეთა სამინისტრომ მომხდარზე გამოძიება უკვე დაიწყო, თუმცა საქმის დეტალები ჯერჯერობით უცნობია. აღსანიშნავია, რომ ადგილობრივები სამართალდამცავ უწყებებს რამდენიმე საათის განმავლობაში არ აძლევდნენ ცხედრის ექსპერტიზაზე გადატანის უფლებას.

სანატორიუმის ყოფილ შენობაში მცხოვრები დევნილები საცხოვრებელ პირობებს აპროტესტებენ. მათი განცხადებით, შენობა ავარიულია და საცხოვრებლად საშიში. რამდენიმე კვირაა პასუხისმგებელ პირებთან, მათ შორის ჯანდაცვის მინისტრთან შეხვედრას ითხოვენ.

"ჩვენ არ მოგცეს არაფრის საშუალება. ქვემოთ რომ მოვდივართ, აქცია რომ გავაკეთოთ, არ გვიშვებენ. გვინდოდა ღამის გათენება იქ, რომ ყველას გაეგო მდგომარეობა, იმის ნებაც არ მოგვცეს. არაფრის ნებას არ გვაძლევენ. სად არ ვიყავით, ყველგან ვიყავით. კაცმა თქვა, ჩვენი საქმე მაინც არ ყოფილაო, გაიქცა და ზემოდან თქვა, ვსო, ჩვენ გულიზა ... შეიძლება, ჩემს მერე მაინც რამე გეშველოთო", — ამბობს ერთ-ერთი დევნილი TV პირველთან საუბრისას.

დევნილი მოსახლეობისთვის მიუღებელია ჯანდაცვის სამინისტროს შემოთავაზება და ალტერნატიულ ფართში ქირით გადასვლა. მათ მოლოდინი აქვთ, რომ ამ პირობაზე დათანხმების შემთხვევაში, სახელმწიფომ შესაძლოა შეწყვიტოს მათთვის ქირის გადახდა და ამის გაკეთება თავად მოუწიოთ. ისინი ამ დრომდე ავარიულ შენობაში რჩებიან. მათი ნაწილი რამდენიმე პროტესტის ნიშნად რამდენიმე დღეა ღამეს ღია ცის ქვეშ ათევს.