კულტურული მემკვიდრეობის დაცვის ეროვნული სააგენტოდან რამდენიმე ადამიანი გაათავისუფლეს. მათი თქმით, სამსახურიდან გაშვების შესახებ ინფორმაცია ელექტრონული ფოსტით მიიღეს. ერთ-ერთი თანამშრომელი ფორმულასთან ამბობს, რომ მას მიზეზად კომპეტენციის ნაკლებობა დაუსახელეს. კულტურული მემკვიდრეობის კვლევის სამსახურის აწ უკვე ყოფილი უფროსი, გიორგი გაგოშიძე ფიქრობს, რომ მისი გათავისუფლების გადაწყვეტილება პოლიტიკურია.

"ხელოვნებათმცოდნეობის დოქტორი ვარ, მაქვს ძალიან ბევრი სტატია, მოქმედი მეცნიერი ვარ, მაქვს რამდენიმე მონოგრაფია, უცხოეთში კონფერენციებში ვიღებ მონაწილეობას, ჩემი სტატიები იბეჭდება უცხოეთში და ცოტა გასაკვირია, როგორ დამიწუნა კომპეტენცია ახალმა დირექციამ, რომელსაც ჩემს საქმეში კომპეტენცია 0 აქვს. [...] უშუალოდ ჩემს სპეციალობასთან არ უნდა იყოს ეს დაკავშირებული, სავარაუდოდ, გვერდითა, მომიჯნავე პოლიტიკის საკითხია. ხშირად ვიღებ მონაწილეობას მიტინგებში, მაგალითად, ვაპროტესტებ ოკუპაციას, მე მგონი, ყველა ქართველმა უნდა გააპროტესტოს. სავარაუდოდ, ეს მიმართულება უნდა იყოს", — ამბობს ის ფორმულასთან.

კიდევ ერთი გათავისუფლებული თანამშრომელი, ნანა კვიციანი კი ტელეკომპანიას უყვება, რომ წერილი დღეს დილით ნახა და გამოგზავნილი წუხელ, გვიან ღამით იყო. მისი თქმით, გულდასაწყვეტია, რომ საგანმანათლებლო სამსახური ერთი ხელის მოსმით დაშალეს.

"როდესაც დაიწყო ჩვენთან ე.წ. რეორგანიზაცია, მე პროტესტი განვაცხადე, რადგან ვთვლიდი, რომ არ ტარდებოდა სწორად და წერილიც მივწერე დირექტორის მოვალეობის შემსრულებელს. კომისია იყო ჩემთვის ძალიან შეურაცხმყოფელი, ვისაც უნდა განესაზღვრა, შევესაბამებოდი თუ არა ჩემს პოზიციას. [...] ძალიან გულდასაწყვეტია, რომ ეს საგანმანათლებლო სამსახური, რომელმაც ძალიან ბევრ ბავშვს დიდი სიხარული მიანიჭა და იმედი მაქვს, ცოდნაც შემატა, ასე ერთი ხელის მოსმით დაშალეს", — ამბობს ის.

თანამშრომლების განცხადებას მოგვიანებით გამოეხმაურა კულტურული მემკვიდრეობის დაცვის სააგენტო. უწყებაში აცხადებენ, რომ რეორგანიზაცია დაასრულეს და შედეგად, 17 სამსახურის ნაცვლად, სააგენტოში ფუნქციონირებას განაგრძობს 11 სამსახური, ხოლო დასაქმებულთა რაოდენობა 381-დან 345-მდე შემცირდა.

სააგენტოში აცხადებენ, რომ რეორგანიზაცია 25 ნოემბერს დაიწყო და დღეიდან, 15 იანვრიდან ახალი საშტატო განრიგი ამოქმედდა.

"რეორგანიზაციის შედეგად განხორციელებული სტრუქტურული ცვლილებები მიზნად ისახავდა სააგენტოზე დაკისრებული ფუნქციების ეფექტური და დროული განხორციელების მიღწევას, ასევე, უწყების წინაშე არსებული სერიოზული გამოწვევების დაძლევას. რეორგანიზაციის შედეგად განხორციელდა ისეთი სტრუქტურული ერთეულების გაერთიანება, რომელთაც ერთმანეთის მსგავსი/მონათესავე ფუნქციები ჰქონდათ. სააგენტოს ოპტიმალური სტრუქტურის მისაღებად ასევე განხორციელდა ისეთი პოზიციების შემცირება, რომელთა გარდაუვალი აუცილებლობაც აღარ არსებობდა", — აცხადებენ უწყებაში.

ამასთან, მათივე ინფორმაციით, სააგენტოს საშტატო ნუსხას დაემატა 17 ოსტატის პოზიცია, რომლებიც აქამდე საერთოდ არ არსებობდა, კერძოდ, ქვითხურო, ხითხურო, კირითხურო, სახურავთა ოსტატი, მჭედელ-ზეინკალი და ხარატი.

"აღსანიშნავია, რომ ოსტატთა რეესტრის შექმნისა და მათი სააგენტოში დასაქმების იდეა კულტურის მინისტრს, თეა წულუკიანს ეკუთვნის, რაც ქვეყანაში კულტურული მემკვიდრეობის დაცვის მიმართულებით არსებულმა პრობლემებმა განაპირობა. კერძოდ, როგორც კულტურის სამინისტროს მიერ ამ სფეროს შესწავლამ ცხადჰყო, ხშირ შემთხვევაში, კულტურული მემკვიდრეობის ძეგლებზე არსებული პრობლემები კვალიფიციური კადრების სიმწირით ან არსებული კადრების პროფესიონალიზმის ნაკლებობითაა გამოწვეული", — აცხადებენ სააგენტოში.

მათივე ინფორმაციით, ცალკე სტრუქტურული ერთეულის სახით შეიქმნა არამატერიალური კულტურული მემკვიდრეობის სამსახური და ძეგლთა ფიქსაციისა და კულტურულ ფასეულობათა კონსერვაცია-რესტავრაციის ლაბორატორია. კულტურული მემკვიდრეობის დაცვის სააგენტოს განცხადებით, ამის მიზეზი ის არის, რომ უწყებაში დღემდე არ არსებობდა სამსახური, რომელიც განახორციელებდა კულტურული მემკვიდრეობის ძეგლების ფოტო/ვიდეო ფიქსაციას, არტეფაქტების ტექნიკურ კვლევასა და დიაგნოსტიკას კვლევის სხვადასხვა მეთოდის გამოყენებით და ა.შ.

სააგენტოს განცხადებითვე, ქვეყნის მასშტაბით კულტურული მემკვიდრეობის ძეგლების მონიტორინგის მიზნით, შეიქმნა ინსპექტორების მობილური ჯგუფები, რომლებიც რეგიონების მიხედვით მოახდენენ კულტურული მემკვიდრეობის ძეგლების მდგომარეობის ინსპექტირებას და უზრუნველყოფენ შემდგომ რეაგირებას.