დაავადებათა კონტროლის ეროვნული ცენტრის ხელმძღვანელი, ამირან გამყრელიძე აცხადებს, რომ კორონავირუსის დადასტურებული შემთხვევებიდან 45% ომიკრონია. მისივე თქმით, ლაბორატორიულად გამოვლენილია 951 შემთხვევა.

"დღევანდელი ცირკულაციის პროცენტი ყველა დადებით შემთხვევაში ომიკრონის არის დაახლოებით, 45%-ის ფარგლებში. 30% არის რეგიონებში და 60% გახლავთ თბილისში. ანუ გაშუალედებული პროცენტი ომიკრონისა არის, დაახლოებით, 45%-ის ფარგლებში და რაც მთავარია, ეს არის მზარდი და საკმაოდ სწრაფად მზარდი. ამიტომ უნდა ველოდოთ, რომ შემთხვევების რაოდენობა გაიზრდება, მაგრამ ამასთან ერთად, რასაც ჩვენი პირველადი ანალიზი გვიჩვენებს, 951 შემთხვევაა ჩვენთან ლაბორატორიულად ლუგარში დადასტურებული ომიკრონის", — თქვა გამყრელიძემ.

ამირან გამყრელიძეს თქმით, დადასტურებული შემთხვევიდან დეტალურად შეისწავლეს 621. მათი საშუალო ასაკი 33 წელია. გამყრელიძემ აღნიშნა, რომ არასრულწლოვანთა რაოდენობა 71-ია, აქედან 13 შემთხვევაა 5 წლამდე, ხოლო 3 ექვს თვემდე. როგორც გამყრელიძემ თქვა, შესწავლილი შემთხვევებიდან მხოლოდ 11-ს დასჭირდა ჰოსპიტალიზაცია და მათგან 7 უკვე გაეწერა.

იაშვილის სახელობის ბავშვთა ცენტრალური საავადმყოფოს სამედიცინო დირექტორი, ივანე ჩხაიძე ვარაუდობს, რომ კორონავირუსით ინფიცირების შემთხვევები ომიკრონის შტამის გამო, იმაზე მეტი იქნება, ვიდრე პანდემიის მთელი პერიოდის განმავლობაში იყო.

11 იანვრის მონაცემებით, საქართველოში კორონავირუსის 5 486 ახალი შემთხვევა დადასტურდა, გამოჯანმრთელდა 2 893, ხოლო გარდაიცვალა — 46 ადამიანი.