ლელოს ლიდერი, მამუკა ხაზარაძე სასამართლო დარბაზიდან გააძევეს. ე.წ. ფულის გათეთრების საქმის პროცესი რამდენიმე წუთის წინ დაიწყო. სხდომა ხმაურის ფონზე წარიმართა — მამუკა ხაზარაძე, ბადრი ჯაფარიძე და ბრალდების მხარე ერთმანეთს სიტყვიერად დაუპირისპირდნენ.

ხაზარაძემ პროკურორს მიმართა, რომ ამ "ბოდვისთვის წერტილი" დაესვათ. "სამი წელია ბოდავთ", უთხრა მან პროკურორს, რაზეც ბრალდების მხარემ უპასუხა:

"სამი წელია მრჩება შთაბეჭდილება, რომ ზრდილობა ვერ ისწავლეთ".

"შენ გგონია 9 წლის მეშინია, შენ გგონია ციხის მეშინია?", უთხრა პროკურორს ხაზარაძემ, რის შემდეგაც მოსამართლემ მას დარბაზი დაატოვებინა.

"გავალ იმიტომ, რომ ეს არ არის სასამართლო, ეს არის მარაზმი, ბიძინას მონები ხართ თქვენ", — განაცხადა მან სხდომის დატოვებისას.

დღეს ხაზარაძე-ჯაფარიძე-წერეთლის ე.წ. ფულის გათეთრების საქმეზე ბოლო სასამართლო სხდომა იმართება. პროცესი 11:00 საათზე იყო ჩანიშნული.

ბადრი ჯაფარიძეს, მამუკა ხაზარაძესა და ავთანდილ წერეთელს პროკურატურა ფულის გათეთრებას ედავება. 2019 წლის 8 იანვარს გავრცელდა ინფორმაცია, რომ პროკურატურამ თიბისი ბანკიდან დოკუმენტები ამოიღო. მაშინ პროკურატურამ განმარტა, რომ თიბისი ბანკის 2008 წლის აქტივობები შეიცავდა ფულის გათეთრების ნიშნებს და მასში თიბისის დამფუძნებლები და ამავდროულად, სამეთვალყურეო საბჭოს თავმჯდომარე, მამუკა ხაზარაძე და მისი მოადგილე ბადრი ჯაფარიძე ფიგურირებდნენ.