უწყებათაშორის საკოორდინაციო საბჭოსთან არსებული ოპერაციული შტაბის უფროსის, გიორგი ღიბრაძის განცხადებით, მნიშვნელოვანია, რომ სამთო კურორტებზე ვინც არის დასასვენებლად ჩასული, მაქსიმალურად დაიცვას ქვეყანაში არსებული წესები და რეგულაციები.

"ტენდენცია აჩვენებს, რომ სამთო კურორტებზეა განსაკუთრებულად მომატებული ინფიცირების შემთხვევები, ამიტომ ძალიან მნიშვნელოვანია სამთო კურორტებზე ვინც არის დასასვენებლად ჩასული, მაქსიმალურად დაიცვას ის წესები და რეგულაციები, რომელიც ქვეყანაში არსებობს. განსაკუთრებით აქცენტი უნდა გაკეთდეს პირბადის ტარებაზე, რადგან ერთ-ერთი მნიშვნელოვანი ფაქტორია ამ შემთხვევაში ეპიდემიის გავრცელების.

მოგეხსენებათ, კვლავ გრძელდება 200-ლარიანი წახალისება 50 წელს ზემოთ პირებისთვის, ასევე, ძალიან მნიშვნელოვანია ვაქცინაციის პროცესის კიდევ უფრო ინტენსიფიკაცია და ძალიან მნიშვნელოვანია ბუსტერ დოზების გაკეთება", — ამბობს ის,

ღიბრაძის განცხადებით, საკოორდინაციო საბჭოს ამ მომენტისთვის დამატებითი შეზღუდვებსა და რეგულაციებზე გადაწყვეტილება არ მიუღია.

11 იანვრის მონაცემებით, საქართველოში კორონავირუსის 5 486 ახალი შემთხვევა დადასტურდა, გამოჯანმრთელდა 2 893, ხოლო გარდაიცვალა — 46 ადამიანი.

ქვეყანაში Covid-19-ის პანდემიის გავრცელებიდან დღემდე დადასტურებული შემთხვევების საერთო რაოდენობა შეადგენს 968 313-ს, მათგან გამოჯანმრთელდა — 916 421, ხოლო ვირუსს ჯამში ემსხვერპლა 14 264 ადამიანი.

ბოლო 24 საათში ქვეყნის მასშტაბით ჩატარდა 57 546 კვლევა ტესტით. მათ შორის ანტიგენის სწრაფი ტესტით — 39 284, ხოლო PCR-ით — 18 262.