საქართველოში აშშ-ის ყოფილი ელჩის, იან კელის განცხადებით, იგი იმედგაცრუებულია საქართველოს ახლანდელი მთავრობით არა მხოლოდ მიმდინარე პოლიტიკური გადაწყვეტილებების გამო, არამედ იმიტომაც, რომ ხელისუფლება შესაბამის მხარდაჭერასა და სოლიდარობას არ გამოხატავს უკრაინის მიმართ. კელის თქმით, მთავრობას ურჩევნია "თავი ჩახაროს", ვიდრე დაეხმაროს იმ ქვეყანას, რომელიც იგივე მდგომარეობაშია, რაც საქართველოს უკვე გავლილი აქვს.

"მე ძალიან იმედგაცრუებული ვარ საქართველოს ახლანდელი მთავრობით. არა მხოლოდ იმ ნაბიჯებით, რომლებითაც ისინი მარგინალიზებას ახდნენ და აუქმებენ კიდეც სახელმწიფო ინსპექტორის აპარატის მსგავს, ძალაუფლების დამაბალანსებელ სტრუქტურებს, არამედ იმიტომაც, რომ ჩვენ საკმარისად არ გაგვიგია საქართველოს ხმა. იქნებ მე გამომრჩა, მაგრამ მგონია, რომ არ გვინახავს მრავალმხრივი, აქტიური რიტორიკა, მხარდაჭერა უკრაინის მიმართ. რაიმე კონკრეტული დახმარების შეთავაზება, პრემიერმინისტრების ზარები და თქმა, რომ ჩვენ იგივე გავიარეთ 2008 წელს, რით შეგვიძლია დაგეხმაროთ, როგორ გაგიზიაროთ ჩვენი გამოცდილება.

ისე ჩანს, რომ მთავრობას ურჩევნია თავი ჩახაროს, ვიდრე გვერდით დაუდგეს პარტნიორ ქვეყანას, რომელიც ახლა იმავეს გადის, რაც საქართველომ გაიარა. ისინი რჩებიან ჩუმად და არ აკეთებენ განცხადებებს, რომლებიც მოსალოდნელი იქნებოდა საგარეო საქმეთა სამინისტროსგან. ვფიქრობ, საქართველოს ბევრად მეტი მხარდაჭერისა და სოლიდარობის გამოხატვა შეუძლია უკრაინისთვის", — განაცხადა მან ამერიკის ხმასთან ინტერვიუში.

იან კელიმ აღნიშნა, რომ უკრაინელებს შეუძლიათ ისწავლონ საქართველოს 2008 წლის გამოცდილებიდან. მნიშვნელოვანია, რომ მათ არ უპასუხონ პროვოკაციებს, დაიცვან საკუთარი ჯარები აღმოსავლეთ უკრაინაში, მაგრამ არ გადავიდნენ თავდასხმაზე. მისივე თმით, მკაცრად უნდა დავუპირისპირდეთ იმ სიყალბეს, რის მტკიცებასაც მოსკოვი ცდილობს, რომ თითქოს ვაშინგტონი აიძულებს საქართველოსა და უკრაინას, რომ ნატოს შეუერთდნენ, რადგან რეალურად ამ ქვეყნებს თავად სურთ დასავლეთისკენ მოძრაობა.