მიზნების დასახვა და მათკენ სწრაფვა ნაადრევი არასდროსაა. მართალია, ვირჯინია ვულფი ახალბედა მწერლებს პირველი წიგნის გამოცემას 30 წლის ასაკამდე არ ურჩევს, მაგრამ 8 წლის დილონ ჰელბიგი სულ სხვაგვარად ფიქრობს.

დილონმა, რომელიც აიდაჰოს შტატში, ქალაქ ბოისეში ცხოვრობს, მთელი წიგნი დაწერა, თავადვე გააფორმა და ადგილობრივი საჯარო ბიბლიოთეკის თაროზე მალულად შემოდო. ამის შესახებ ბიბლიოთეკარებმა მაშინ შეიტყვეს, როცა მათ ახალგაზრდა მწერლის დედამ დაურეკა.

"გვითხრა, რომ თავისმა შვილმა წიგნი დაწერა და ბიბლიოთეკაში, თაროზე დატოვა", — ჰყვება ბიბლიოთეკარი პეიჯ ბიჩი, — "მერე კი მოთმინებით დაელოდა შესაფერის მომენტს, რომ თავისი ოჯახისთვის წიგნის ამბავი ეუწყებინა და ისიც დაემატებინა, ბიბლიოთეკაში შეგიძლიათ მოიკითხოთო".

ფოტო: Idaho Press

დილონის ხელნაწერი წიგნი, დილონის საშობაო თავგადასავალი, სოლიდურ 88 გვერდს მოიცავს. მაგარყდიან "გამოცემას" ავტორის ილუსტრაციები და ყუაზე ბიბლიოთეკის საკუთრების აღმნიშვნელი სიმბოლოც კი ერთვის. ეს უკანასკნელი თავად ბიბლიოთეკარებს გამოადგათ, როცა თაროებზე წიგნის ძებნა დაიწყეს.

თუმცა, ეს ყველაფერი არაა — ბიბლიოთეკამ დილონს 2021 წლის საუკეთესო ახალგაზრდა რომანისტის ჯილდო გადასცა. პეიჯის თქმით, წიგნს გამოსაჩენ ადგილას დადებენ, როცა ავტორის დედა მას დააბრუნებს.

"ძალიან გვიხარია და გვეამაყება, რომ მისმა წიგნმა და ნახატებმა ამხელა ყურადღება მიიქცია", — ამბობს დილონის დედა, სიუზენ ჰელბიგი, — "კომიქსების სტილში წიგნებისა და ისტორიების წერა 5 წლის ასაკში დაიწყო. მისმა მიზანდასახულობამ, რომ საკუთარი წიგნი თაროზე ეხილა, შედეგი გამოიღო".