ყაზახეთის ყოფილი პრეზიდენტის, ნურსულთან ნაზარბაევის პრესსპიკერი აცხადებს, რომ ნაზარბაევს ქვეყანა არ დაუტოვებია და ამასთან დაკავშირებით ცრუ ინფორმაცია ვრცელდება.

"ელბასი იმყოფება ყაზახეთის დედაქალაქში, ნურ-სულთანში. ნუ ავრცელებთ განზრახ არასწორ და სპეკულაციურ ინფორმაციას. ელბასი ატარებს მთელ რიგ საკონსულტაციო შეხვედრებს და პირდაპირ კავშირზეა ყაზახეთის პრეზიდენტთან, ყასიმ-ჟომართ ტოყაევთან", — წერს აიდოს უკიბაი ტვიტერზე.

მისივე ინფორმაციით, ნაზარბაევმა გამართა რამდენიმე სატელეფონო საუბარი მეგობარი სახელმწიფოების ხელმძღვანელებთან

"ელბასი ყველას მოუწოდებს მიმდინარე გამოწვევბის გადალახვისთვის და ჩვენი ქვეყნის მთლიანობის უზრუნველყოფისთვის გაერთიანდნენ ყაზახეთის პრეზიდენტის ირგვლივ", — წერს უკიბაი.

გუშინ, 7 იანვარს, მედიამ გაავრცელა ინფორმაცია, რომ ყაზახეთის ყოფილმა პრეზიდენტმა, ნურსულთან ნაზარბაევმა და მისმა შვილებმა ქვეყანა დატოვეს.

ყაზახეთში კვლავ დაძაბულობაა. საწვავის ფასის ზრდის გამო 4 იანვარს დაწყებული მასობრივი აქციების შემდეგ, ყაზახეთის მთავრობა გადადგა, თუმცა დაპირისპირება არ შეწყვეტილა. მოქალაქეები პრეზიდენტის გადადგომას ითხოვენ. ქვეყნის მასშტაბით საგანგებო მდგომარეობაა გამოცხადებული.

დემონსტრანტებმა აიღეს ალტანის აეროპორტი და ჩამოაგდეს ნურსულთან ნაზარბაევის ძეგლი. მოგვიანებით, აეროპორტზე კონტროლი სამთავრობო ძალებმა აიღო. მთელი ქვეყნის მასშტაბით გათიშული იყო, როგორც მობილური, ასევე ხაზის ინტერნეტი და დაბლოკილია რამდენიმე აპლიკაცია. ინტერნეტი ქალაქების ნაწილში აღდგა.

მოქმედმა პრეზიდენტმა, ყასიმ-ჟომარტ ტოყაევმა დემონსტრანტებს ხულიგნები უწოდა, ძალადობასა და მაღაზიების ძარცვაში დაადანაშაულა. "სახელმწიფო ინსტიტუტების დაცვისა და ძალოვანი სტრუქტურების დახმარების" მიზეზით ტოყაევმა მხარდაჭერა კოლექტიური უსაფრთხოების ორგანიზაციას, იგივე ОДКБ-ს სთხოვა. ქვეყნის ტერიტორიაზე შევიდნენ რუსული ჯარებიც, მათ შორის, BBC-ის ინფორმაციით, რუსეთმა ყაზახეთში 45-ე საჰაერო სადესანტო სპეცდანიშნულების ბრიგადა გაგზავნა, რომელიც 2008 წელს რუსეთ-საქართველოს ომში მონაწილეობდა.

7 იანვარს ყასიმ-ჟომარტ ტოყაევმა განაცხადა, რომ ამ ეტაპზე ქვეყანაში "ანტიტერორისტული" ოპერაცია მიმდინარეობს, რომელიც "ბოევიკების სრულ განადგურებამდე" გაგრძელდება. მისივე თქმით, სამართალდამცავებს და არმიას მისცა ბრძანება, რომ ცეცხლი გაფრთხილების გარეშე გახსნან.