ექსპრეზიდენტმა მიხეილ სააკაშვილმა მისი მოთხოვნების დაკმაყოფილებისთვის ულტიმატუმის ვადა თვის ბოლომდე გადაწია. შეგახსენებთ, რომ სააკაშვილი ადვოკატებთან კომუნიკაციის კონფიდენციალობასა და რუსთავის ციხეში ექიმების შეშვებას ითხოვს.

"მიხეილ სააკაშვილის პოზიცია გახლავთ შემდეგი, რომ იმ შემთხვევაში, თუ მისი მოთხოვნები არ დაკმაყოფილდება და მას არ გაეწევა ადეკვატური სამედიცინო დახმარება იანვრის თვის განმავლობაში, ის მიმართავს პროტესტის უკიდურეს ზომებს", — განაცხადა შოთა თუთბერიძემ და დააზუსტა, რომ პროტესტი ფორმა, მათ შორის, შესაძლოა იყოს შიმშილობაც.

შოთა თუთბერიძე მიმართავს ადვოკართა ასოციაციას, პირადად მის ხელმძღვანელს, დავით ასათიანს და ყველა ადვოკატს, დაეხმარონ პრობლემის აღმოფხვრაში.

"ეს არის ყველა ადვოკატის პრობლემა. ყველა ადვოკატმა იცის, რომ პაემნების ოთახში, მათ შორის სატელეფონო გზით, არ უნდა ელაპარაკო დაცვის ქვეშ მყოფს, მიტომ, რომ ყველა შენს სიტყვას ისმენენ. ჩვენ ვფიქრობთ, რომ ერთადერთი გზა, რაც არსებობდა, ეს იყო წერილობითი კომუნიკაცია, როცა გვქონდა შანსი, რომ კონფიდენციალურად გვესაუბრა, არის წართმეული მიხეილ სააკაშვილისთვის და ჩვენთვის, მისი ადვოკატებისთვის", — აცხადებს თუთბერიძე.

კითხვას, რამდენად სერიოზულად აღიქვამს საზოგადოება ულტიმატუმის გადაწევას, ადვოკატი ასე პასუხობს:

"მე არ მახსოვს არცერთი შეუსრულებელი ულტიმატუმი ან არცერთი დარღვეული ულტიმატუმი მიხეილ სააკაშვილის მხრიდან. არცერთი მისი დაპირება არ მახსოვს შეუსრულებელი, განსხვავებით იმ ადამიანებისგან, რომლებიც ყოველ დღე ტყულს იძახიან იუსტიციის სამინისტროს შენობიდან და პრემიერმინისტრის პოზიციისგან [...] მე დარწმუნებული ვარ, რომ ქართველი ხალხი ძალიან სერიოზულად აღიქვამს მიხეილ სააკაშვილის თითოეულ განცხადებას".

ადვოკატებთან კომუნიკაციის კონფიდენციალობასა და ექიმების დაშვებას მიხეილ სააკაშვილმა 3 დეკემბერს მოითხოვა და ულტიმატუმის ვადად დღევანდელი დღე, 6 დეკემბერი განსაზღვრა. მანვე თქვა, რომ მოთხოვნის განსაზღვრულ ვადამდე შეუსრულებლობის შემთხვევაში პროტესტის უკიდურეს ფორმას მიმართავს, თუმცა არ დაუკონკრეტებია — რას.

გაიგე მეტი: