საავტომობილო გზების დეპარტამენტის ინფორმაციით, თოვლისა და ლიპყინულის გამო ამ დროისთვის მოძრაობა შეზღუდულია არამხოლოდ შიდასახემწიფოებრივ, არამედ საერთაშორისო მნიშვნელობის გზებზეც. კონკრეტულად, მისაბმელიანი და ნახევრადმისაბმელიანი ტრანსპორტის მოძრაობა აკრძალულია მცხეთა–სტეფანწმინდა–ლარსისა და გუდაური-კობის მონაკვეთზე. დანარჩენი სახის ტრანსპორტის მოძრაობა ჯერჯერობით თავისუფალია.

გარემოს ეროვნული სააგენტოს ინფორმაციით, მლეთა-გუდაურის და გუდაური-კობის მონაკვეთებზე მოძრაობა მხოლოდ ზვავდამცავი გვირაბების გავლით, საპატრულო პოლიციის ზედამხედველობით იქნება შესაძლებელი.

გარდა ამისა, დიდთოვლობის გამო მოძრაობა შეიზღუდა შიდასახელმწიფოებრივი მნიშვნელობის კიდევ ერთი გზის მონაკვეთზე — ბათუმი-ახალციხის საავტომობილო გზის 86-106 კილომეტრზე მოძრაობა დასაშვებია მხოლოდ მაღალი გამავლობის ტრანსპორტისთვის, ხოლო დანარჩენი სახის ავტოტრანსპორტის მოძრაობა აკრძალულია.

იგივე მიზეზით მოძრაობა აკრძალულია ალპანა-ცაგერის გზაზე, ასევე, ნაქერალას უღელტეხილზე, საჩხერე-ონის საავტომობილო გზასა და ომი-საჩხერე-ჭიათურა-ზესტაფონის საავტომობილო გზის 18-40 კილომეტრზეც.