ქართული ოცნების დეპუტატის, დავით სერგეენკოს განცხადებით, ყოფილი პრეზიდენტის, მიხეილ სააკაშვილის გორის ჰოსპიტლიდან გადაყვანა მოულოდნელი არავისთვის უნდა ყოფილიყო. მისი თქმით, ყველასათვის ცნობილი იყო, რომ მდგომარეობის დასტაბილურებისთანავე სააკაშვილს სასჯელაღსრულების დაწესებულებაში დააბრუნებდნენ.

"ის რომ მსჯავრდადებული მიხეილ სააკაშვილი დაბრუნდებოდა სასჯელაღსრულების დაწესებულებაში, სიურპრიზი არავისთვის არ უნდა ყოფილიყო, რადგან წინასწარვე იყო ცნობილი, რომ მას შემდეგ, რაც მისი მდგომარეობის სტაბილიზაცია მოხდებოდა, სასჯელაღსრულებაში დაბრუნდებოდა. ეს არ იყო მოულოდნელი გადაწყვეტილება, თავისთავად ცხადი მოცემულობა იყო, გადაყვანამდეც გორის ჰოსპიტალში, როგორც კი დასტაბილურდებოდა, დაბრუნდებოდა უკან", — თქვა სერგეენკომ.

სერგეენკო ასევე ამბობს, რომ სააკაშვილის ჯანმრთელობის მდგომარეობაზე ექიმებმა უნდა ისაუბრონ.

გუშინ, 29 დეკემბერს სააკაშვილის ადვოკატებმა გაავრცელეს ინფორმაცია, რომ ექსპრეზიდენტი გორის ჰოსპიტლიდან რუსთავის მე-12 დაწესებულებაში გადაიყვანეს.

ოფიციალური განცხადება ამ დრომდე არცერთ უწყებას გაუვრცელებია.