საპარლამენტო უმრავლესობის წევრი, ეკა ბესელია განმარტავს, რომ ვენეციის კომისიის მიერ შემუშავებული დოკუმენტი არა მხოლოდ საკონსტიტუციო სასამართლოს შესახებ კანონში 14 მაისს შეტანილ ცვლილებებს ეხება, არამედ იმ მოქმედ ნორმებსაც, რომლებიც კომისიის დასკვნის თანახმად, გასასწორებელია:

"ვენეციის კომისია ამბობს, რომ ეს წინასწარი მოსაზრებაა და საჭიროა, რომ ამაზე უფრო სიღრმისეულად ვიმსჯელოთ და გავაგრძელოთ მუშაობა. მათ შორის, გვეუბნება, რომ კონსტიტუციასთან დაკავშირებითაც არის მოქმედ ნორმაში გასასწორებელი რამდენიმე საკითხი და გვთავაზობს, რომ გრძელვადიან პროცესში დაიწყოს ამ საკითხებზე მუშაობა, რაც ნამდვილად არის საყურადღებო. ჩვენც ვაპირებთ, რომ ვიმუშაოთ შემდგომ ეტაპზე, რომ სხვა ანტიკონსტიტუციური ჩანაწერებიც, რაც არის მოქმედ კანონში, გასწორდეს".

ბესელიას განმარტებით, სამუშაო პროცესი პარლამენტში უნდა დაიწყონ, თუმცა შეუძლიათ საკითხთან დაკავშირებით პრეზიდენტის წარმომადგენლობასაც ესაუბრონ.

14 მაისს პარლამენტმა საკონსტიტუციო სასამართლოს შესახებ კანონში ცვლილებები შეიტანა, რომელთან დაკავშირებითაც ოპოზიციასა და არასამთავრობო ორგანიზაციებს უარყოფითი დამოკიდებულება აქვთ.

გარდა ამისა, აღნიშნული დოკუმენტი პრეზიდენტმაც განიხილა და ის ვენეციის კომისიას დასკვნისთვის გადაუგზავნა, საიდანაც საქართველომ რიგი შენიშვნები და დადებითი რეკომენდაციები მიიღო.