უმრავსელობის წევრის, გიორგი ვოლსკის განცხადებით, ვენეციის კომისიის მიერ საკონსტიტუციო სასამართლოს შესახებ კანონთან დაკავშირებით შემუშავებული დოკუმენტი არის არა დასკვნა, არამედ უბრალოდ მოსაზრებები:

"თუმცა, პროფესიონალური მოსაზრებებია. მისასალმებელია ის საკითხები, რომ მხარდაჭერილია მთელი რიგი თემები, რომელიც, რატომღაც, კრიტიკული შემოტევების თემები იყო პარლამენტში მუშაობისას, მაგრამ ვენეციის კომისიამაც დაადასტურა, რომ პოზიტიურია რიგი ცვლილებები, რომლებიც მივიღეთ".

ვოლსკის თქმით, ვინაიდან ვადა ჯერ კიდევ არის, არის რიგი საკითხები, რომლებზეც კიდევ სამუშაოა:

"მუშაობაა საჭირო, ჩვეულებრივი, ნორმალური პროცესი მიდის. თუმცა, რასაკვირველია, ეს თემაც პოლიტიკური სპეკულაციების თემად იქცევა".

14 მაისს პარლამენტმა საკონსტიტუციო სასამართლოს შესახებ კანონში ცვლილებები შეიტანა, რომელთან დაკავშირებითაც ოპოზიციასა და არასამთავრობო ორგანიზაციებს უარყოფითი დამოკიდებულება აქვთ.

გარდა ამისა, აღნიშნული დოკუმენტი პრეზიდენტმაც განიხილა და ის ვენეციის კომისიას დასკვნისთვის გადაუგზავნა, საიდანაც საქართველომ რიგი შენიშვნები და დადებითი რეკომენდაციები მიიღო.