ბასიანის დამფუძნებლის, ნაჯა ორაშვილის განცხადებით, კლუბების დალუქვით ხელისუფლების მიზანი გამოიკვეთა და ეს საკლუბო სფეროს განადგურება, დაშინება და გაქრობაა. ნაჯა ორაშვილი ამ წუთებში კლუბ ბასიანთან იმყოფება, სადაც შრომის ინსპექციის წარმომადგენლები მივიდნენ.

"თუნდაც თავისუფლების აღკვეთად დამიჯდეს, ამ სივრცეს არ დავალუქინებ, იმიტომ, რომ სახელმწიფო არის მზრუნველი სახელმწიფო, ან მას სხვა გეგმები და სხვა მიზნები აქვს. ჩვენ 6 თვე ვიმუშვეთ გამოსავალზე, ცოდნაზე, გამოცდილებაზე დაფუძნებულ სტანდარტზე, რომელსაც უნდა უზრუნველეყო დახურულ სივრცეებში ვირუსის გავრცელების რისკის მინიმუმამდე დაყვანა. მათ ამაზე უარი გვითხრეს, შესაბამისად, მიზანი გამოკვეთილია, ეს არის ამ სივრცეების, ამ თავისუფალი, მართლა უსაფრთხო სივრცეების ფიზიკური განადგურება, ჩვენი დაშინება და ზოგადად გაქრობა", — განაცხადა მან.

17 დეკემბერს, ღამის კლუბების გახსნამდე რამდენიმე საათით ადრე, შრომის ინსპექციამ გაავრცელა განცხადება, რომ კლუბებში ღონსიძიებების გამართვა ამ ეტაპზე აკრძალულია. მათივე განმარტებით, მიმდინარეობს მუშაობა ე.წ. ღამის კლუბების უსაფრთხოების პროტოკოლის პროექტის შემუშავებაზე, რომელიც უწყებათაშორის საკოორდინაციო საბჭოს წარედგინება და მიღებული იქნება შესაბამისი გადაწყვეტილება.

საპასუხოდ, კლუბების წარმომადგენლები ამბობდნენ, რომ გახნის შესახებ მთავრობამ იცოდა და ღონისძიებებს ჩაატარებენ. პარასკევს კლუბები მართლაც გაიხსნა და შრომის ინსპექციის შესვლის შესახებ ინფორმაცია არ გავრცელებულა.

მეორე დღეს, 18 დეკემბერს თბილისის ღამის კლუბებმა განაცხადეს, რომ შრომის ინსპექციასთან შეხვედრის შემდეგ დაგეგმილი ღონისძიებების ერთი კვირით გადადებაზე შეთანხმდნენ. მათი თქმით, ეს ბოლო კომპრომისია.

19 დეკემბერს, შეხვედრის შესახებ გავრცელებულ ინფორმაციაში კი შრომის ინსპექცია წერდა, რომ გადაწყვეტილებას "კლუბების ფუნქციონირების აღდგენის შესაძლებლობასთან დაკავშირებით" საკოორდინაციო საბჭო ერთობლივი განხილვების შემდეგ მიიღებს. მათივე ინფორმაციით, საბოლოო გადაწყვეტილება მიღებული იქნება ყველა შესაძლო რისკის, განსაკუთრებით ახალი, ომიკრონ შტამის სწრაფი გავრცელების შესაძლებლობის და შესაბამისი უსაფრთხოების ზომების მაქსიმალური უზრუნველყოფის განსაზღვრის შედეგად.

20 დეკემბერს კლუბებმა განაცხადეს, რომ შრომის ინსპექციის წერილში შეთანხმების პირობები ასახული არ იყო და მათი დროებით გადავადებული ღონისძიებები, როგორც გაუქმებული, ისე გამოაცხადეს. კლუბები ამბობდნენ, რომ ყველა შესაძლო ზომას მიმართავენ, რათა სივრცის უსაფრთხოდ გახსნა შეძლონ.

მწვანე პასპორტების ამოქმედების მიუხედავად, კლუბების მუშაობა ჯერ დაშვებული არ არის. 4 დეკემბერს შრომის ინსპექციამ კლუბი ხიდი 10 000 ლარით დააჯარიმა და დალუქა. კლუბის წარმომადგენლებმა "ესკალაციის თავიდან აცილების მიზნით", ტერიტორია დატოვეს, თუმცა პასუხისმგებელ პირებს "გონივრული ვადა" მისცეს, რათა მათი მუშაობა დაუშვან.