აბაშის საკრებულოს ახლადარჩეული თავმჯდომარე, ლევან მაკალათია 21 დღეში თანამდებობიდან გადადგა. მისი თქმით, "თავი ამოწურა", საკრებულო "დაალაგა" და გუნდში დაპირისპირება არ ყოფილა, გადაწყვეტილებაც თავად მიიღო.

"ამოვწურე უბრალოდ თავი, აბაშაში მუშაობა. მივიღეთ 2021 წლის ბიუჯეტში ცვლილებები, 2022 წლის ახალი ბიუჯეტი, დავამტკიცეთ კომისიები და დავტოვე აღნიშნული თანამდებობა. სანამ საკრებულოს თავმჯდომარე გავხდებოდი, 4 წელი ვიყავი აბაშის მერი. შემდეგ იმ ვითარებიდან გამომდინარე, რომ იყო რთული არჩევნები, დავალაგეთ საკრებულო, ავირჩიეთ კომისიები, მივიღეთ ბიუჯეტი და წამოვედი თანამდებობიდან. არანაირი დაპირისპირება გუნდში არ გვქონია", — ამბობს ის ფორმულასთან.

ლევან მაკალათია აბაშის საკრებულოს თავმჯდომარედ 3 დეკემბერს აირჩიეს. როგორც ის ამბობს, ახალი თავმჯდომარის არჩევამდე მის მოვალეობებს თავმჯდომარის პირველი მოადგილე შეასრულეს.