წელიწადის ყველაზე მაგიური დრო ახლოვდება. საახალწლო განათებები ციმციმებს, საშობაო სიმღერები საკუთარ ფიქრებზე უფრო ხშირად ჩაგვესმის და საჩუქრების შერჩევაც დღის წესრიგში დგება... და, მართალია, ზუსტად ვიცით, რა სურს საახალწლოდ მერაია ქერის, მაგრამ მაინც დღეში სამჯერ გვახსენებენ.

თუმცა წლის მიწურულს, საახალწლო განწყობის პარალელურად, მცირეოდენი გამძლეობაც გვჭირდება, რადგან როგორც კი ზრდასრულობაში შედგამ ფეხს, დღესასწაულები გამოწვევების გარეშე წარმოუდგენელი ხდება. მათ შორის ყველაზე მეტი სტრესის მომტანი კი სწორედ ახალი წელია.

ქვემოთ იმ რამდენიმე საზრუნავზე ვიწუწუნებთ, რომლებიც ზოგჯერ იანვრის სწრაფად დადგომასაც კი გვანატრებინებს.

1. მუდმივი შეგონებები "წონის შენარჩუნებაზე"

თითქოს საზოგადოებიდან წამოსული ზოგადი სტრესი არ გვეყოფოდაო, წლის დასასრულს სადაც გაიხედავ, ყველგან გხვდება სტატიები, რჩევები და შეგონებები იმის შესახებ, თუ როგორ შეიძლება სადღესასწაულო პერიოდში წონაში მატების თავიდან აცილება. თუმცა, ახალი წლის პირობებში კალორიების კონტროლი იმდენადვე რთულია, რამდენადაც ცაზე რუდოლფის დანახვა და უაზრო ნერვიულობის მეტი არაფერი მოაქვს. ეგ რაა, 31 დეკემბერს ოლივიეს სტაფილოს შეჭმაც კი შეიძლება დანაშაულად ჩაგეთვალოს.

სამაგიეროდ, პირევლი იანვრიდან, საშობაო სასწაულის მსგავსად, ყოველგვარი შეზღუდვა იხსნება და შენც, როგორც იქნა, გადაწყვეტ, რომ საკუთარი თავისადმი მეტად მიმტევებელი იყო. სამჯერადი და ჯანსაღი კვების იდეები წარსულს ბარდება და ვარჯიშის სურვილიც დროებით ქრება. მაშინ, რაღა საჭირო იყო, წინასაახალწლოდ ნერვების შლა?

2. საჩუქრების შერჩევა

იყო სანტა, მარტივი სულაც არ არის. იმის განურჩევლად, რამდენ დროს ატარებ საყვარელ ადამიანთან ერთად, მისთვის საჩუქრის შერჩევა შეიძლება მაინც დიდი სირთულე აღმოჩნდეს. შესაძლოა, ამაზე ფიქრი ერთი თვით ადრეც კი დაიწყო, მაგრამ ბოლო წუთს შოპინგი მაინც ვერ აირიდო თავიდან. როცა სურნელოვანი სანთლის არომატის შერჩევას 40 წუთი დაუთმე, ახლა მდინარე მისისიპიზე უფრო გრძელ რიგში დგახარ და მაინც ეჭვი გღრღნის, რომ ადრესატს ის სულაც არ მოეწონება, წამით შეიძლება ახალი წლის ჯადოსნურობაშიც კი შეგეპაროს ეჭვი.

3. საახალწლო სუფრაზე განსჯის ობიექტად ყოფნა

ახალი წელი იდეალური დროა შორეულ ნათესავებთან შეხვედრისა და მათი ცნობისმოყვარეობის დასაკმაყოფილებლად. "რაზე აბარებ?", "პირად ცხოვრებაში ახალი არაფერია?" და "მუშაობა ჯერ არ დაგიწყია?" — მცირე ჩამონათვალია იმ კითხვების, რომლებზე პასუხის გაცემაც დღესასწაულების პერიოდში გვიწევს. ამგვარ დიალოგებთან გამკლავებისთვის საუკეთესო გზა იუმორის და მსუბუქი სარკაზმის გამოყენებაა. თუმცა, იუმორი არ გამოგადგება ნათესავებთან განათლების საკითხებზე საუბრისას. თუ თქვენი განხრა ტექნოლოგიებს უკავშირდება, წარმატებებს გისურვებთ ბებია-ბაბუისთვის მისი მნიშვნელობის ახსნისას.

4. საჩუქრების შეფუთვა

ნივთის შეფუთვა რთული არ უნდა იყოს, არა? თუმცა, მცდელობისას ხვდები, რომ ამაზე დიდი წინაღობა ცხოვრებაში არ შეგქმნია. ყოველ წელს ხელახლა ვსწავლობ შეფუთვას, მაგრამ მთავარი სირთულე მაშინ იჩენს თავს, როდესაც შესაფუთი საგანი ოთხკუთხა არ არის. თუმცა, ამ შემთხვევაში მაინც არსებობს გამოსავალი — სასაჩუქრე ჩანთა, რომლის გამოყენებაც ვიდეოსწავლებების ყურებასა და დაუღალავ შრომას არ მოითხოვს.

5. იმის კონტროლი, რომ ბავშვების თანდასწრებით თოვლის ბაბუის არარსებობაზე სიტყვა არ დაგცდეს

"როდესაც იგებ, რომ სანტა კლაუსი არ არსებობს, იმ მომენტიდან იწყება დაღმა სვლა", — ამბობს სუზან ვარენი (უზო ადუბა) სერიალში, ნარინჯისფერი ახალი შავია. მართლაც, თოვლის ბაბუის არსებობაში დაეჭევება ბავშვობის გარდამტეხი მომენტია. იმედგაცრუება გარდაუვალია და დღესასწაულიც მაგიურობას კარგავს. თუმცა, მე საიდუმლოსთვის ფარდის ახდის შემდეგ 3 წელი მაინც ვწერდი თოვლის ბაბუას წერილებს მიუხედავად იმისა, რომ ვიცოდი, ადრესატი ლაპლანდიაში მყოფი თეთრწვერა ჯადოსნური არსება სულაც არ იყო.

6. უცვლელი დღის ეთერი

ახალი წელი ჩემთვის ისევე ასოცირდება მანდარინთან და ოლივიესთან, როგორც უსაზღვროდ შეყვარებულ ბურნუთასთან და წყლის ჭავლის ქვეშ ტანსაცმლით მდგომ იპოლიტთან. ეს უკანასკნელი ერთ-ერთი მთავარი პერსონაჟია ფილმისა, ბედის ირონია, ანუ გაამოთ, რომელსაც საახალწლო ეთერში გაშვების სიხშირით მხოლოდ ჰარი პოტერი თუ გაუტოლდება. დიდი ხნის განმავლობაში წარმოუდგენლად მეჩვენებოდა, ახალ წელს ისე ჩაევლო, რომ ტელევიზორიდან ანდრეი მიაგკოვის "თუ არ გყავს მამიდა" არ გაჟღერებულიყო.

თუ ახალი წლის პერიოდი თქვენთვის მერაია ქერის All I want for christmas-ზე არანაკლებ ასოცირდება "რა კარგი ხარ სიყვარულოსთან", მაშინ მარტო არ ხართ. ათწლიანი დაკვირვების შედეგად აღმოვაჩინე, რომ ყოველწლიურად იანვრის პირველ დღეებში ეთერს იმერული ესკიზები, ჭრიჭინა, სიყვარული ყველას უნდა, შერეკილები, თოჯინები იცინიან, კავკასიელი ტყვე ქალი და ლუი დე ფიუნესის კომედიები ამშვენებენ. მიუხედავად იმისა, რომ ფანტომასის სერიები რამდენადმე სასაცილოა და ზემოთჩამოთვლილი ქართული ფილმებიც უდავოდ შთამბეჭდავია, ჩემთვის მაინც ამოუხსნელ ამოცანად რჩება, რა კავშირი აქვს თითოეულ მათგანს ახალ წელთან.

7. უძილო ღამეები

განსხვავებით ტელევიზიისგან, რომელიც ნაკლებად ზრუნავს საახალწლო განწყობაზე, ამ საქმეს სრული სერიოზულობით ეკიდებიან მეზობლები. ამ დასკვნამდე კი მაშინ მივედი, როცა ღამის ოთხ საათზე მოპირდაპირე კორპუსში მცხოვრებთა აივნების განათებებმა არ დამაძინა. თუმცა, შესაძლოა, მათი მიზანი არა განწყობის შექმნა, არამედ უცხოპლანეტელებისთვის საიდუმლო გზავნილის გადაცემა ან სატელიტიდან საკუთარი სახლის დანახვა იყო.

8. ოჯახური ფოტოს გადაღება

მთელი წლის განმავლობაში საერთო ფოტოს გადაღებისგან თავის დაძვრენას რომც ახერხებდე, ახალ წელს შენი მიმართულებით ჩიტი მაინც გამოფრინდება. ასეთ დროს ბოლო იმედად ის გრჩება, რომ ნათესავთა სიმრავლის გამო ფოტოზე არ გამოჩნდები.

წარმატებები ამ გამოწვევებთან გამკლავებაში!

დაბოლოს...