ვაზისუბნის დასახლებაში აფეთქების შედეგად დაშავებული 5 ადამიანიდან ერთის მდგომარეობა სტაბილურია, თუმცა როგორც ექიმი ამბობს, დიაგნოზი სერიოზულია. დამწვრობის ცენტრის დირექტორის, გუგა ქაშიბაძის განცხადებით, მას სხეულის 60% აქვს დამწვარი და მოთავსებულია რეანიმაციულ განყოფილებაში.

"პაციენტი კაცი შემოვიდა ჩვენს კლინიკაში 43 წლის, სხეულის თერმული დამწვრობით 60%, ამას ემატებოდა სასუნთქი გზების დაზიანება და პაროტრამვა, რაც სავარაუდოდ ამ გაზის აფეთქებამ გამოიწვია. დამწვრობით შოკით მოთავსდა დამწვრობის ცენტრის რეანიმაციულ განყოფილებაში. დილისთვის მისი მდგომარეობა არის სტაბილური, თუმცა დიაგნოზი საკმაოდ სერიოზული აქვს. დამწვრობის შოკიდან ჯერჯერობით არ გამოსულა, მიმდინარეობს ინტენსიური მკურნალობა", — ამბობს ექიმი.

ისნის რაიონის გამგებელის, ნიკა ელისაშვილის განცხადებით, ადგილზე თბილისის ლაბორატორიული სამსახური ამოწმებს კორპუსის მდგომარეობას. მისი თქმით, 5 ოჯახი გადაყვანილია სასტუმროში.

"გამოწერილია 2 ადამიანი, მსუბუქად იყვნენ ისინი და ველოდებით, რომ დანარჩენ ორ ადამიანსაც გამოწერენ. ადგილზეა თბილისის ლაბორატორიული სამსახური, ამოწმებს კორპუსის მდგრადობას, მზიდი კედლების მდგომარეობა, არის თუ არა დაზიანებული. 5 ოჯახი არის გადაყვანილი სასტუმროში ყველანაირი პირობა აქვთ შექმნილი ამ ადამიანებს, სანამ თავიანთ სახლებს დაუბრუნდებიან", — ამბობს გამგებელი.

ვაზისუბნის დასახლებაში აფეთქების შესახებ ინფორმაცია 19 დეკემბერს, დაახლოებით 22:00 საათზე გავრცელდა. საგანგებო სიტუაციების სამსახურის წარმომადგენლის განცხადებით, აფეთქება გაზის დაგროვების შედეგად მოხდა.