ენერგეტიკისა და წყალმომარაგების მარეგულირებელი კომისიის გადაწყვეტილებით, ელექტროენერგიის გადახდის ვადები იცვლება. კომპანია თელმიკოში აცხადებენ, რომ მოსახლეობა ელექტროენერგიის ქვითარს ყოველი მომდევნო თვის პირველ რიცხვებში მიიღებს. ხოლო კომპანია თელასი მრიცხველებს ყოველი თვის ბოლო ოთხი დღის განმავლობაში წაიკითხავს.

მოსახლეობას ელექტროენერგიის გადასახადის გადახდა ქვითრის მომზადებიდან 15 კალენდარული დღის ვადაში შეეძლებათ. გარდა ამისა, მათივე ცნობით, პენსიონერები, სოციალურად დაუცველი და მრავალშვილიანი ოჯახები გადახდის საშეღავათო პერიოდით ისარგებლებენ. პენსიონრები ელექტროენერგიის საფასურის დაფარვას ყოველის თვის 16 რიცხვამდე, ხოლო სოციალურად დაუცველი და მრავალშვილიანი ოჯახები ყოველი თვის 22 რიცხვამდე შეძლებენ.

"აღნიშნული ცვლილების შედეგად, მოსახლეობის ამ ჯგუფებისთვის ელექტროენერგიის საფასურის გადახდის ვადა, პენსიისა და სოციალური დახმარების მიღების ვადებზე იქნება მორგებული. მნიშვნელოვანია, რომ პირველად მრიცხველების ერთიანი წაკითხვა მიმდინარე წლის დეკემბრის ბოლოს განხორციელდება. შესაბამისად დეკემბერი გარდამავალი პერიოდია, რომლის განმავლობაშიც, თელმიკოს აბონენტების ნაწილი მიიღებს ელექტროენერგიის 2 ქვითარს. პირველ ქვითარს მომხმარებლები ჩვეულ დროს მიიღებენ და მასში ასახული იქნება ელექტროენერგიის წინა თვის გადასახადი, ანუ ნოემბერის და ნაწილობრივ დეკემბერის. მეორე ქვითარს აბონენტები მიიღებენ დეკემბრის ბოლოს ან იანვრის დასაწყისში და მასში ასახული იქნება დეკემბრის დარჩენილი დღეების გადასახადი", — აცხადებს კომპანია.

მათივე ინფორმაციით, გამონაკლისი მხოლოდ იმ აბონენტებისთვის იქნება, რომლებიც სტანდარტულად ქვითარს თვის ბოლომდე იღებენ. კომპანიაში ამბობენ, რომ მათთან იანვრის დასაწყისში მხოლოდ ერთი ქვითარი მივა და მასში დეკემბრის გადასახადი იქნება ასახული. ცვლილელები 2022 წლის იანვრიდან ამოქმედდება.