პრეზიდენტმა, სალომე ზურაბიშვილმა ეროვნულ თანხმობაზე ინიციატივა პატრიარქს წარუდგინა და "კურთხევა სთხოვა". ინფორმაციას პრეზიდენტის ადმინისტრაცია ავრცელებს.

"საქართველოს პრეზიდენტი, სალომე ზურაბიშვილი დღეს სრულიად საქართველოს კათოლიკოს პატრიარქს, უწმინდესსა და უნეტარეს ილია მეორეს შეხვდა. საქართველოს საპატრიარქოში გამართულ პირისპირ შეხვედრაზე საქართველოს პრეზიდენტმა პატრიარქს ეროვნული თანხმობის პროცესის დაწყების შესახებ საკუთარი ინიციატივა გააცნო, რაზედაც პატრიარქს კურთხევა სთხოვა", — ვკითხულობთ ადმინისტრაციის განცხადებაში.

უცნობია, მისცა თუ არა პატრიარქმა პრეზიდენტს კურთხევა, თუმცა ინიციატივა მოსწონთ. საპატრიარქოს გავრცელებულ განცხადებაში ვკითხულობთ:

"მისი უწმინდესობაც და, ბუნებრივია, ეკლესიაც, ამჟამადაც, როგორც ყოველთვის, დაუჭერს მხარს ნებისმიერ ინიციატივას და ქმედებას მიმართულს ერთსულოვნებისკენ, რომელიც დაფუძნებული იქნება ქრისტიანულ და სამართლიან საფუძვლებზე".

10 დეკემბერს, აშშ-ში, დემოკრატიის სამიტზე სიტყვით გამოსვლისას სალომე ზურაბიშვილმა განაცხადა, რომ დაიწყებს ინკლუზიურ პროცესს და ეროვნული მასშტაბის საუბარს, რომელშიც მთელი საზოგადოება იქნება ჩართული. ზურაბიშვილის თქმით, ამით მივაღწევთ უახლესი ისტორიის "საერთო აღქმას" და წავალთ წინ.

მოქმედ პრეზიდენტის გამოეხმაურა ყოფილი პრეზიდენტი, მიხეილ სააკაშვილი და მას ასევე ყოფილი პრეზიდენტის, გიორგი მარგველაშვილის იდეის შესრულება შესთავაზა. საუბარია სამივე პრეზიდენტის შეხვედრაზე. სააკაშვილმა ზურაბიშვილი და მარგველაშვილი გორის სამხედრო ჰოსპიტალში შესახვედრად მიიწვია.

იდეას გამოეხმაურა მარგველაშვილიც, რომელმაც განაცხადა, რომ სამი პრეზიდენტის შეხვედრა სწორად დანახული დინამიკაა.

პრეზიდენტის განცხადებას გამოეხმაურა ბოდბელი ეპისკოპოსი იაკობიც. 13 დეკემბერს, ქადაგებისას მან, ფაქტობრივად, ეკლესიის სივრცე შესთავაზა "შესარიგებლად". მეუფე იაკობმა ქადაგებისას რამდენჯერმე ხაზგასმით აღნიშნა, რომ შეუძლია ტყუილ-მართლის გარჩევა, მაგრამ არ აპირებს რომელიმე მხარეს დადგეს.

"მე გამიხარდა, ცალკეულმა პარტიებმა, აი, თუნდაც პრეზიდენტის გამოხმაურება, მაგრამ თუ არა ეკლესიაში, შანსი არ არის ჩვენი შერიგების. ეს ყველამ კარგად ვიცოდეთ. იმიტომ, რომ ეკლესიაში შერიგება ნიშნავს იმას, რომ ჩვენ ერთმანეთის ღირსებას გავუფრთხილდებით. დღეს არ ვუფრთხილდებით ერთმანეთის ღირსებას", — განაცხადა ეპისკოპოსმა.