ჯანდაცვის კომიტეტის თავმჯდომარე, დიმიტრი ხუნდაძე ადასტურებს, რომ ჯანდაცვის მინისტრის პოსტზე, სხვებთან ერთად, არჩილ თალაკვაძის კანდიდატურასაც განიხილავენ. კითხვაზე, რამდენად შეძლებს თალაკვაძე ჯანდაცვის სფეროში არსებულ გამოწვევებს გაუმკლავდეს, ხუნდაძე ამბობს, რომ ის გამოცდილი კადრი და "კარგი ადამიანია".

"საკმაოდ გამოცდილი კადრია, კარგი ადამიანია, კარგი პროფესიონალია და სექტორშიც აქვს მნიშვნელოვან გადაწყვეტილებებში მონაწილება მიღებული, მაგალითად C ჰეპატიტის ელიმინაციის პროგრამა, მას უწყებრივ თანამდებობებზე აქვს საკმაოდ დიდი გამოცდილება", — თქვა მან.

ტიკარაძის გადადგომის შემდეგ ვრცელდება მოსაზრება, რომ მმართველ გუნდში მის შემცვლელად არჩილ თალაკვაძეს განიხილება. ასევე, მედიები საუბრობენ ლევან რატიანზე, ნინო კობახიძესა და დავით სერგეენკოზე.

ჯანდაცვის ჯერ კიდევ მოქმედმა მინისტრმა, ეკატერინე ტიკარაძემ თანამდებობიდან გადადგომის შესახებ 9 დეკემბერს განაცხადა. ამის შესახებ მან ქართული ოცნების ოფისში სპეციალურად გამართულ ბრიფინგზე ისაუბრა. უფრო ზუსტად, ტიკარაძემ თავისი სამწლიანი მოღვაწეობა შეაფასა, ყველას მადლობა გადაუხადა და განაცხადა, რომ კონსულტაციების შემდეგ სწორად მიიჩნია საქმიანობის პარტიის პოლიტსაბჭოში გაგრძელება. მინისტრს სიტყვა გადადგომა არ უხსენებია, არც ჟურნალისტების კითხვებს უპასუხა, ამიტომ მისი გადადგომის დაზუსტება უწყების პრესამსახურში გახდა საჭირო.

12 დეკემბერს, მისმა მოადგილემ, თამარ გაბუნიამ განაცხადა, რომ ტიკარაძე თანამდებობაზე წლის ბოლომდე იქნება. მანვე აღნიშნა, რომ გადადგომაზე არ იცოდა, თუ ის გადადგომას აპირებდა.

ეკატერინე ტიკარაძისა და პრემიერმინისტრ ირაკლი ღარიბაშვილის შესაძლო დაპირისპირებაზე მედია რამდენიმე დღე აქტიურად საუბრობდა. ამბობდნენ, რომ დაპირისპირება კორონავირუსის მართვაზე განსხვავებულმა ხედვებმა გამოწივია. ამ თემაზე ჯანდაცვის მინისტრს რამდენჯერმე ჰკითხეს, თუმცა ის პასუხს თავს ირიდებდა. გარდა ამისა, მინისტრს ეკითხებოდნენ, იყო თუ არა დაპირისპირების და კამათის მიზეზი მწვანე პასპორტების საკითხი, რაზეც ის ამბობდა, რომ არა დაპირისპირება, არამედ განხილვა ჰქონდათ.

ტიკარაძემ რამდენჯერმე თქვა ისიც, რომ არ ემხრობოდა მთავრობის დაწესებულ უვადო მწვანე პასპორტის იდეას და როგორც ჯანდაცვის სფეროს წარმომადგენელი, ვირუსის მართვის უფრო მკაცრი ზომების მომხრე იყო.