ჯანდაცვის ჯერ კიდევ მოქმედი მინისტრის, ეკატერინე ტიკარაძის განცხადებით, "შორს არ მიდის" და მის ნებისმიერ შემცვლელს გაუზიარებს საკუთარ გამოცდილებას. ასე უპასუხა ტიკარაძემ ჟურნალისტს, რომელმაც ჰკითხა, უარყოფითად ხომ არ იმოქმედებდა რთული ეპიდსიტვაციის დროს მინისტრის გადადგომა.

"მე არ მივდივარ შორს, აქედან გამომდინარე, ნებისმიერი ჩემი კოლეგა, რომელიც დაიკავებს ამ ადგილს, ვარ მზად, გავუზიარო მას ის გამოცდილება, რომელიც და შესაბამისად, რა თქმა უნდა, ხელი შევუწყო მის წარმატებას", — ამბობს ტიკარაძე.

ჟურნალისტებმა ასევე ჰკითხეს, ხომ არ იცის ვინ იქნება მისი შემცვლელი და განიხილება თუ არა კანდიდატად დეპუტატი არჩილ თალაკვაძე, რაზეც ტიკარაძემ თქვა, რომ მას არ აქვს ინფორმაცია, რადგან არ არის ჩართული კონსულტაციებში.

ეკატერინე ტიკარაძემ თანამდებობიდან წასვლის შესახებ 9 დეკემბერს განაცხადა, თუმცა ის საქმიანობას წლის ბოლომდე გააგრძელებს. მანამდე მედიაში აქტიურად ვრცელდებოდა ინფორმაცია პრემიერმინისტრ ირაკლი ღარიბაშვილსა და ეკატერინე ტიკარაძეს შორის არსებულ დაპირისპირებაზე. გავრცელებული ინფორმაციის თანახმად, დაპირისპირება იყო ბოლო საკოორდინაციო სხდომაზეც, თუმცა მოგვიანებით, ეს უარყვეს.

აღსანიშნავია, რომ ტიკარაძე მწვანე პასპორტის უვადობას არ ემხრობოდა. როგორც მან 4 დეკემბერს განაცხადა, მიუხედავად იმისა, ჯანდაცვის სამინისტრო და დაავადებთა კონტროლის ცენტრი მთავარი უწყებები არიან ამ რეკომენდაციების გაცემის მხრივ, ვერ იტყვის, რომ "სრულად იზიარებენ ამ გადაწყვეტილებას". კოვიდგადატანილებისთვის მუდმივი პასპორტი პრემიერმინისტრის რეკომენდაცია იყო. 8 ნოემბერს ღარიბაშვილმა აღნიშნა, რომ არსებობდა მოსაზრება 6-თვიან ვადაზე, თუმცა საბოლოოდ საბჭომ უვადობაზე მიდი წინადადება გაიზიარა.