ნაციონალური მოძრაობის ერთ-ერთი ლიდერის, ლევან ხაბეიშვილის განცხადებით, ხელისუფლების ცვლილების შემდეგ, პარტიის გადაწყვეტილებით, აქციებზე "უკანონოდ" დაკავებულ აქტივისტებს ჯარიმები ჩამოეწერებათ და კომპენსაცია დაენიშნებათ. ამის შესახებ მან სპეციალურ ბრიფინგზე ისაუბრა.

"ნაციონალურ მოძრაობაში მიღებულია გადაწყვეტილება, რომ როგორც კი შეიცვლება რეჟიმი, ყველა აქტივისტი, ყველა სამოქალაქო აქტივისტი, ყველა ადამიანი, რომლებიც დაკავებულები იყვნენ პოლიტიკური ნიშნით აქციაზე სიტყვისა და გამოხატვის თავისუფლებისთვის და იყვნენ დაჯარიმებულები, ყველა ჯარიმა იქნება ჩამოწერილი და მათ გადაეხდებათ კომპესაცია და მინიმუმ, ეს იქნება ორმაგი, რასაც დღეს ქართული ოცნების ხელისუფლება ამ ადამიანების სადამსჯელოდ იყენებს.

ანუ ყველა პირი, ვინც აქციაზე გამოხატვისა და სიტყვის თავისუფლებისთვის უკანონოდ დააკავეს პოლიტიკურად, ამ ადამიანებს გადაეხდებათ კომპენსაციის სახით ორმაგი თანხა, რაც ამ დრომდე დააკისრა ქართულმა ოცნებამ. ასევე, ყველა ადამიანი, ვინც რეჟიმის მსხვერპლი იყო და აქციაზე უკანონოდ დააკავეს და ყოველგვარი მტკიცებულებების გარეშე ჰყავდათ ან ჰყავთ გამოკეტილი ციხეში, როგორც კი რეჟიმი შეიცვლება, ყველა ეს საქმე ინდივიდუალურად გადაიხედება და მათაც და მათი ოჯახის წევრებსაც სახელმწიფოსგან გადაეხდება კომპენსაცია", — აცხადებს ის.

ხაბეიშვილმა, ასევე, ისაუბრა მოსამართლეებისა და პოლიცილების პასუხისმგებლობაზე. მისი თქმით, ისინი, ხშირ შემთხვევაში, "უკანონო და პოლიტიკურ" გადაწყვეტილებებს იღებენ, რაზეც სამართლებრივი ღონისძიებების გატარება მოუწევთ.