გახარიას გუნდმა დაარეგისტრირა კანონპროექტი, რომლის მიხედვითაც, საკრებულომ ყველა გადაწყვეტილება ღია კენჭისყრით უნდა მიიღოს. პარტიის წევრის ანა ბუჩუკურის განცხადებით, ითხოვენ ამ კანონპროექტის დაჩქარებული წესით განხილვას, რადგან სწორედ ახლა მიმდინარეობს საკრებულოებში თანამდებობის პირთა არჩევა.

"ქართულ ოცნებას ფაქტია, რომ გადაწყვეტილი აქვს ძალაუფლების ლეგიტიმაციის ერთადერთი წყაროს, ხალხისვე მიღებული გადაწყვეტილების უგულებელყოფა. ის უკანონო და ხაზს ვუსვამ, ბინძური მეთოდებით ცდილობს, საკრებულოებში უმრავლესობის შექმნას და არათუ ერიდება, არამედ პირიქით, ამაყობს კიდევაც ამ გადაწყვეტილებით.

შექმნილი ვითარებიდან გამომდინარე, იმისთვის, რომ ერთის მხრივ, სააშკარაოზე გამოვიდეს "ოცნების" უკანონობა, ხოლო მეორეს მხრივ, გამოირიცხოს სხვადასხვა პარტიის მიერ სპეკულაციები და გაიზარდოს საკრებულოს წევრთა კეთილსინისინდისიერებისა და მათი საქმიანობის გამჭვირვალობის და ანგარიშვალდებულების ხარისხი, ჩვენმა საპარლამენტო გუნდმა, დავაინიცირეთ, წარვადგინეთ საქართველოს პარლამენტში კანონპროექტი. პროექტის მიხედვით მუნიციპალიტეტის საკრებულოს მიერ მიღებული აბსოლუტურად ყველა გადაწყვეტილება უნდა იყოს ღია კენჭისყრის, მათ შორის, როდესაც ეს გადაწყვეტილება ეხება პირის თანამდებობაზე არჩევას, გადაყენებას თუ უნდობლობის გამოცხადების საკითხების გადაწყვეტას. ბუნებრივია ვითხოვთ ამ კანონპროექტის დაჩქარებული წესით განხილვას, ვინაიდან ახლად არჩეული საკრებულოების მიერ სწორედ ამ ეტაპზე მიმდინარეობს თანამდებობის პირთა არჩეული პროცედურები", — თქვა ბუჩუკურმა პარლამენტში გამართულ ბრიფინგზე.

მან ასევე განაცხადა, რომ სხვადასხვა საკრებულოს წევრთა მიმართ მიმდინარეობს ზეწოლა, დაშინება, მოსყიდვისა და გადაბირების მცდელობა. როგორც პარტიაში ამბობენ, მათ ქართულ ოცნებასაც და ნაციონალურ მოძრაობასაც შესთავაზეს საჯარო მოლაპარაკებები.

"მოგეხსენებათ, რომ ადგილობრივ არჩევნებზე საქართველოს მოქალაქეებმა გადაწყვიტეს, დაესრულებინათ ერთპარტიული მმართველობა მუნიციპალურ დონეზე და დღეს მთელ რიგ საკრებულოებში წარმოდგენილი გახლავთ არაერთი პარტია. სამწუხაროდ, ოცნება არჩევნების შემდეგაც აგრძელებს არჩევნებამდე დაწყებული უკანონო მეთოდების გამოყენებას და მოსყიდვით შანტაჟით და მუქარით, მოქალაქეთა ნების საწინააღმდეგოდ, ცდილობს უმრავლესობის შექმნას საკრებულოებში. შეგახსენებთ, რომ სხვადასხვა პარტიის წარმომადგენელთა მოსყიდვით თუ მუქარის გზით გადაბირება ოცნებამ ჯერ კიდევ არჩევნების დასრულებისთანავე დაგვიანონსა. შედეგად ვიხილეთ ფარული მოლაპარაკებები, ადგილობრივი წარმომაგენლების, მოსყიდვის დაშინების და გატაცების ფაქტებიც კი", — ამბობს ბუჩუკური.

გახარიას გუნდის პარტიის დეპუტატები მიმართავენ, რომ განიხილონ ეს კანონპროექტი და მიიღონ.