საქართველოს მეოთხე პრეზიდენტ გიორგი მარგველაშვილს სამი პრეზიდენტის შეხვედრის ინიციატივა ძალიან ადეკვატური ტაქტიკად მიაჩნია. მარგველაშვილის განცხადებით, რამდენიმე მომენტიდან გამომდინარე, ასეთი პროცესი ამ ფორმატში ვერ ჩაიკეტება. მისივე თქმით, სამი პრეზიდენტის შეხვედრა, როგორც დასაწყისი, სწორად დანახული დინამიკაა.

"შენ [ზურაბიშვილი] ბუნებრივად აკეთებ უკვე წონის აწევას ამ პროცესისა და შეიძლება, თუ გუშინ გაკრიტიკებდნენ, მარტო როგორც მოქმედ მეხუთე პრეზიდენტს, გაკრიტიკებდა კონკრეტული პოლიტიკური ძალა, დღეს, როდესაც იგივე პოზიციაზე ხართ მესამე, მეოთხე, მეხუთე [პრეზიდენტები], შენი პოლიტიკური წონა ბევრად იზრდება. ქალბატონ პრეზიდენტს არ აკლია პოლიტიკური წონა, მაგრამ ასეთ ვითარებაში ბევრად უფრო იზრდება", — განაცხადა მარგველაშვილმა მთავარი არხის ეთერში.

მისივე განცხადებით, მეორე მომენტია ის, რომ ზურაბიშვილს აქვს შესაძლებლობა საქართველოში მანამდე არარსებული პრეცედენტი შექმნას, რაც მაგალითად თავად სააკაშვილმა ვერ მოახერხა.

"მესამე, რეალურად ასეთი შეხვედრა არის ყველა პოლიტიკური გემოვნების მომცველი, რომლის შედეგადაც, რა თქმა უნდა, ამ შეხვედრაზე კონკრეტულ მუხლებს და კანონპროექტებს არ გაივლი, მაგრამ ძალიან კარგ პოლიტიკურ პლატფორმას შექმნი შემდეგი საუბრისთვის", — აღნიშნავს მეოთხე პრეზიდენტი.

მისი თქმით, ეს შეხვედრა ავლაბრის რეზიდენციაში უნდა შედგეს. სალომე ზურაბიშვილის სურვილის შემთხვევაში კი, სააკაშვილს გორის სამხედრო ჰოსპიტლიდან გამოიყვანენ.

თუმცა, 2021 წელს განვითარებული პოლიტიკური მოვლენებიდან გამომდინარე, მარგველაშვილი ამ საკითხზე პესიმისტურადაა განწყობილი.

11 დეკემბერს მიხეილ სააკაშვილი სალომე ზურაბიშვილის ინიციატივას გამოეხმაურა ინკლუზიურ პროცესზე და გიორგი მარგველაშვილის იდეის შესრულება შესთავაზა. კერძოდ, სააკაშვილი მარგველაშვილსა და ზურაბიშვილს შეხვედრას სთავაზობს. მისივე თქმით, ზურაბიშვილს ამ შეხვედრაზე შეწყალებას არ სთხოვს.

სააკაშვილის ამბობს, რომ საქართველოს სჭირდება მშვიდობა, განვითარება და სრული გადატვირთვა. მისი თქმით, დრო ძალიან ცოტაა და არც ერთი წუთის დაკარგვა არ შეიძლება, ამიტომაც, სთხოვს საზოგადოებას, პოლიტიკურ ძალებს, არასამთავრობო სექტორს, მედიას, საერთაშორისო თანამეგობრობას, ხელი შეუწყონ რეკონსილიაციის პროცესს და მის შემოთავაზებულ ფორმატს.

გაიგე მეტი: