ქართული ოცნების დეპუტატის, არჩილ თალაკვაძის განცხადებით, სანამ ნაციონალური მოძრაობა პოლიტიკურ შეცდომებსა და დანაშაულს არ აღიარებს, რაიმე შერიგებაზე საუბარი შეუძლებელი იქნება. მისივე თქმით, შერიგება და შეთანხმება ყოველთვის სამართლიანობასა და მის პრინციპებს ეფუძნება.

"ეს კიდევ ერთხელ ადასტურებს, რომ პრეზიდენტი ზურაბიშვილი ნამდვილად წარმოადგენს ზეპარტიულ ინსტიტუტს, რასაც ჩვენ ყოველთვის ვამბობდით და ეწინააღმდეგებოდა ოპოზიცია. შერიგება და შეთანხმება ყოველთვის ეფუძნება სამართლიანობასა და მის პრინციპებს და სანამ ნაციონალური მოძრაობა სამართლიანად არ აღიარებს იმ პოლიტიკურ შეცდომებსა და დანაშაულს, რისთვისაც მართლმსაჯულების წინაშე წარსდგა არაერთი მისი პოლიტიკური ლიდერი, რა თქმა უნდა, შეუძლებელი იქნება რაიმე შერიგებაზე საუბარი", — განაცხადა თალაკვაძემ.

გუშინ, 10 დეკემბერს პრეზიდენტი სალომე ზურაბიშვილი აშშ-ის პრეზიდენტ ჯო ბაიდენის მიერ ორგანიზებულ დემოკრატიის სამიტზე საქართველოს სახელით წარსდგა და განაცხადა, რომ წამოიწყებს ინკლუზიურ პროცესს, საუბარს ეროვნული მასშტაბით, რომელშიც მთელი საზოგადოება იქნება ჩართული. ზურაბიშვილის თქმით, ამით მივაღწევთ უახლესი ისტორიის "საერთო აღქმას" და წავალთ წინ. პრეზიდენტის თქმით, საჭიროა ურთიერთპატივისცემაზე დაფუძნებულ საჯარო დისკურსი, წარსულზე საუბარი და იმის გააზრება რაც მოხდა.

6 დეკემბერს კი მიხეილ სააკაშვილმა განაცხადა, რომ ბრძოლა გამძაფრდება და არ გაჩერდება ქართული ოცნების დამარცხებამდე. ალტერნატივად სააკაშვილი მმართველ პარტიას "გონს მოსვლას" და ეროვნულ შერიგება შესთავაზა. მისი თქმით, "ეს ყველასთვის საუკეთესო გამოსავალია". მესამე პრეზიდენტს "დიდი შერიგების" იდეა მანამდეც არაერთხელ ჰქონია.

ამავე თემაზე: