ოპოზიციონერი დეპუტატის, სალომე სამააშვილის განცხადებით, რუსეთი აგრესიული თავდასხმის რეჟიმზე გადავიდა. მისი თქმით, ამაზე საჭიროა ძალიან მკვეთრი პასუხი, როგორც საქართველოს ხელისუფლების, ასევე, უკრაინელ პარტნიორებთან ერთად, დასავლეთის მხრიდან შესაბამისი რეაგირების მობილიზება მოხდეს.

"ძალიან აშკარაა, რომ რუსეთი სხვა ფაზაში გადავიდა. მე ვიტყოდი, აგრესიული თავდასხმის რეჟიმზე გადავიდა. რაც შეეხება საქართველოს და უკრაინის ნატოში გაწევრიანებას, ის უკვე მოითხოვს, არა მხოლოდ შეჩერებას პროცესის, არამედ მიღებული გადაწყვეტილებების რევიზიას და დეზავუირებას იმ განაცხადის, რაც არის ჩაწერილი ნატოს უმაღლესი პოლიტიკური ფორუმის შესაბამის დოკუმენტებში.

ყოველი დღე, რომელსაც ჩვენ ვერ ვიყენებთ ნატოში ჩვენი გაწევრიანების ასაჩქარებლად, ეს არის სახიფათო ჩვენი ქვეყნის უსაფრთხოებისთვის. იმიტომ, რომ ვხედავთ, რომ რუსეთი გადავიდა აგრესიული თავდასხმის რეჟიმზე", — ამბობს სამადაშვილი.

რუსეთის საგარეო საქმეთა სამინისტრო მოითხოვს, გაუქმდეს 2008 წლის ბუქარესტის სამიტის გადაწყვეტილება, რომლის მიხედვითაც საქართველო და უკრაინა ნატოში უნდა გაწევრიანდნენ. სერგეი ლავროვის უწყებამ "რუსეთის უსაფრთხოების დაცვის" მოტივით მოთხოვნებით სავსე განცხადება გამოაქვეყნა, რომელშიც დასავლეთი, ყველაზე მეტად კი აშშ და NATO-ს წევრი ქვეყნების არის გაკრიტიკებული.

რუსეთის საგარეო უწყების განცხადებას საქართველოს საგარეო საქმეთა სამინისტრო მიუღებლად მიიჩნევს. საგარეო უწყების განცხადებით, NATO-ში გაწევრიანება საქართველოს სუვერენულ გადაწყვეტილებას წარმოადგენს, რომელიც დაფუძნებულია საქართველოს მოსახლეობის უმრავლესობის ურყევ ნებაზე. აღნიშნული მიზანი ასახულია საქართველოს კონსტიტუციაშიც.