ნოემბერში სოციალური შემწეობა 637 747 ადამიანმა მიიღო, რაც საქართველოსთვის რეკორდულად მაღალი მაჩვენებელია. სოციალური მომსახურების სააგენტოს ინფორმაციით, სოციალურ დახმარებას საქართველოს მოსახლეობის 17,1% იღებს.

სოციალური შემწეობის მიმღებთა რაოდენობა ბოლო ერთ წელში 24%-ით, ანუ 122 047 ადამიანით არის გაზრდილი. როგორც სტატისტიკაშია აღნიშნული, ნოემბერში დახმარება საქართველოში მცხოვრებმა 172 886-მა ოჯახმა მიიღო.

რეგიონების მიხედვით შემწეობის მიმღებთა რაოდენობა ასე ნაწილდება:

  1. თბილისი — 129 716 ადამიანი;
  2. იმერეთი — 82 886 ადამიანი;
  3. ქვემო ქართლი — 76 610 ადამიანი;
  4. სამეგრელო-ზემო სვანეთი — 75 218 ადამიანი;
  5. აჭარის ავტონომიური რესპუბლიკა — 69 953 ადამიანი;
  6. კახეთი — 65 618 ადამიანი;
  7. შიდა ქართლი — 57 954 ადამიანი;
  8. გურია — 27 387 ადამიანი;
  9. სამცხე-ჯავახეთი — 19 180 ადამიანი;
  10. მცხეთა-მთიანეთი — 18 641 ადამიანი;
  11. რაჭა-ლეჩხუმი და ქვემო სვანეთი — 14 584 ადამიანი.

ნოემბერში სოციალური შემწეობის მიმღებთათვის 43 698 423 ლარი გადაირიცხა. გასული წლის იმავე თვეში ამ პროგრამის ბიუჯეტი 29 010 721 ლარი იყო — შესაბამისად, ბოლო ერთი წლის ჭრილში სოციალურად დაუცველებისთვის გადარიცხული თანხის მოცულობა 51%-ით, ანუ 14 687 702 ლარით არის გაზრიდლი.

რამდენიმე კვირის წინ პრემიერმინისტრმა, ირაკლი ღარიბაშვილმა განაცხადა, რომ არსებული სოციალური პოლიტიკის ფარგლებში მოქალაქეები "უმუშევრობას, უმოქმედობას და სიღარიბეს" შეაჩვიეს. ის შრომისუნარიანი სოციალურად დაუცველი ადამიანების დასაქმების ინიციატივით გამოვდა. ამ თემაზე ეკონომიკის მინისტრმა, ნათია თურნავამაც ისაუბრა და თქვა, რომ მთავრობის მიერ შემუშავებული რეფორმა სიღარიბის დაძლევასა და დასაქმების პარამეტრების გაუმჯობესებას გამოიწვევს.