შობას ყველა იმსახურებს საჩუქარს, მიუხედავად იმისა, თუ მთელი წელი როგორ იქცეოდა. სწორედ ამიტომ, ლონდონში, ბუნების ისტორიის მუზეუმში, გადაწყვიტეს, ტირანოზავრისთვის სადღესასწაულო ჯემპრი მოექსოვათ.

დინოზავრის მოდელისთვის ჯემპრი ერთ-ერთმა ინგლისურმა ოჯახურმა საწარმომ შექმნა. საწარმოს სვიტრები ედ შირანისა და ბრიტანელი პარლამენტარებისთვისაც კი აქვს მოქსოვილი. თუმცა, სამოსის ტირანოზავრისთვის შექმნას ბევრად დიდი დრო და ენერგია დასჭირდა — საწარმოს თანამშრომლები ჯემპრზე თითქმის 100 საათი მუშაობდნენ.

საბოლოო შედეგი ჩვეულებრივ ჯემპრზე 12-ჯერ მძიმეა, მაგრამ მუზეუმი ტირანოზავრის სამოსის ადამიანის ზომის ასლებსაც ყიდის.

მუზეუმის წარმომადგენლის, კარლა თრიჟერის თქმით, რთული წლის შემდეგ, ხალხის გასამხიარულებლად, მათ სახალისო რაღაცის გაკეთება უნდოდათ.

"ვფიქრობ, შესანიშნავად გამოიყურება", — ამბობს კარლა ფერად ჯემპრში გამოწკეპილ ტირანოზავრზე, — "ძალიან რთული წელი იყო მუზეუმებისთვის და ამით გვინდოდა, ხალხში ინტერესი გაგვეღვივებინა. ჯემპრების გაყიდვით მიღებული მთელი შემოსავალი მუზეუმს მოხმარდება".

მუზეუმის წარმომადგენელი დასძენს, რომ საწარმოც საგანგებოდ აირჩა, რადგან ისინი პროდუქტის შესაქმნელად გადამუშავებულ ქსოვილებსა და პლასტმასის ბოთლებს იყენებენ.