საქართველოს სახელმწიფო უსაფრთხოების სამსახურის ანტიკორუფციული სააგენტოს თანამშრომლებმა #4 სამედიცინო ცენტრის დირექტორი და ამავე ცენტრის ექიმი პფაიზერის ვაქცინით აცრის დამადასტურებელი ყალბი საბუთის დამზადებისთვის დააკავეს. უწყების განცხადებით, გამოძიებით დგინდება, რომ აღნიშნულმა პირებმა, კონკრეტული თანხის სანაცვლოდ, დაამზადეს კოვიდსაწინააღმდეგო აცრის დამადასტურებელი ყალბი საბუთი და დაავადებათა კონტროლის ეროვნული ცენტრის ოფიციალურ ვებგვერდზე უკანონოდ დაარეგისტრირეს, რის შედეგადაც მოქალაქე, რომელსაც არ ჰქონდა გავლილი შესაბამისი იმუნიზაცია, აღირიცხა აცრილად. შესაბამისად, მიენიჭა სახელმწიფოს მიერ კოვიდრეგულაციის ფარგლებში დადგენილი შეღავათები.

ანტიკორუფციული სააგენტოს ინფორმაციით, გარდა ხსენებული ეპიზოდისა, გამოძიების ფარგლებში მოპოვებული მტკიცებულებებით დასტურდება, რომ ქმედება ერთჯერად ხასიათს არ ატარებდა და ბრალდებულები არავაქცინირებული პირების ჯანმრთელობის ეროვნული ცენტრის ვებგვერდზე რეგისტრაციას სისტემატურად ახორციელებდნენ, ყალბი დოკუმენტების დამზადება-გამოყენების გზით.

"ამჟამად მიმდინარეობს ხსენებული პირების იდენტიფიცირება და პარალელურ რეჟიმში ტარდება ინვენტარიზაცია #4 სამედიცინო დაწესებულებისთვის გადაცემული ვაქცინის ხარჯვის კანონიერების დასადგენად. ქვეყანაში შექმნილი კოვიდვითარებიდან გამომდინარე, მოვუწოდებთ მოსახლეობას, თუკი ანალოგიური ხერხით დარეგისტრირებულნი არიან NCDC-ის ოფიციალურ ვებ-გვერდზე და კანონით დადგენილი წესით არ აქვთ გავლილი ვაქცინაცია, ნებაყოფლობით გამოცხადდნენ საგამოძიებო ორგანოში და სისხლისსამართლებრივი პასუხისმგებლობისგან გათავისუფლდებიან, წინააღმდეგ შემთხვევაში მათ მიმართ დადგება შესაბამისი პასუხისმგებლობის საკითხი", — ნათქვამია განცხადებაში.

სუს-ის ანტიკორუფციული სააგენტოს ცნობით, გამოძიება სისხლის სამართლის კოდექსის 221-ე მუხლის მე-4 ნაწილით და 362-ე მუხლის პირველი ნაწილით მიმდინარეობს.