კულტურის, სპორტისა და ახალგაზრდობის მინისტრის, თეა წულუკიანის განცხადებით, იმის მიუხედავად, რომ "ცარიელი სკამების ბელადი" ამაყობდა ბილიკების დაგებით, დღეს საქართველოს არცერთი ველობილიკი არ აქვს. წულუკიანის თქმით, წინა ხელისუფლებამ, რომლის წევრებსაც მინისტრი "დაქეციანებულებს" უწოდებს, გაყიდა ველოტრეკი უზნაძის ქუჩაზე და ველოსპორტი დღეს არის "დაქცეული".

"ცარიელი სკამების ბელადი იყო ამაყი იმით, რომ აგებდა რაღაცა ბილიკებს, მაგრამ დღეს საქართველოს არ აქვს არცერთი ბილიკი, აქვს უბრალოდ ნაწყვეტ-ნაწყვეტ რაღაცა სასეირნო ბილიკები, რომელიც ერთმანეთთან არ კავშირდება, გაივლი რამდენიმე ასეულ მეტრს და შემდეგ უნდა მიაწყო ველოსიპედები და გადაჯდე მანქანაზე. შესაბამისად, ჩვენ არ გვაქვს ის ბილიკები, სადაც სპორტსმენები მოემზადებიან და დღეს მინდა იცოდეთ, იმიტომ, რომ გაქვთ უფლება იცოდეთ, რომ ჩვენი სპორტსმენი ბავშვები, ვინც ველოსპორტით არის დაკავებული, ვარჯიშობს საავტომობილო გზებზე და გვაქვს ამ მხრივ დანაკარგიც სიცოცლის. ეს არის უკიდურესად საშიში.

შესაბამისად, ველობილიკების მშენებლობა ველოსპორტისთვის არის ძალიან მნიშველოვანი, იმიტომ, რომ ამათ, მართლა დაქეციანებულებმა, რატომ არ მოვიდნენ დღეს, რა საინტერესოა, გაყიდეს ველოტრეკი უზნაძის ქუჩაზე, რომელიც ჩემს ბავშვობაში ძალიან წარმატებული იყო და დღეს რეალურად ეს სპორტიც არის პრაქტიკულად დაქცეული", — განაცხადა მან პარლამენტში.