პარტიას საქართველოსთვის წევრის, ბერდია სიჭინავას განცხადებით, იმ მუნიციპალიტეტებში, სადაც გახარიას პარტიას გადამწყვეტი ხმები აქვს, პირველ სხდომაზე საკრებულოს თავმჯდომარეობის კანდიდატებს მხოლოდ მარტვილსა და რუსთავში დაასახელებენ. რაც შეეხება სხვა მუნიციპალიტეტებს, სიჭინავა ამბობს, რომ სხდომას დაესწრებიან, თუმცა დღეს თავმჯდომარეობის, მოადგილეებისა და კომისიების დაკომპლექტებაში მონაწილეობაზე უარს ამბობენ.

"იმ მუნიციპალიტეტების საკრებულოებიდან, სადაც ჩვენს პარტიას გააჩნია გადამწყვეტი ხმები, დღეს, პირველ სხდომაზე, საკრებულოების თავმჯდომარეობის კანდიდატებად ჩვენს წარმომადგენლებად ვასახელებთ მხოლოდ მარტვილსა და რუსთავში. დანარჩენ მუნიციპალიტეტებში, სადაც ასევე გვაქვს გადამწყვეტი ხმები, თქვენ იცით, რომ ეს არის ზუგდიდის მუნიციპალიტეტი, სენაკის მუნიციპალიტეტი, ჩხოროწყუს მუნიციპალიტეტი და წალენჯიხის მუნიციპალიტეტი, დავესწრებით სხდომებს, თუმცა საკრებულოს თავმჯდომარეობის, მათი მოადგილეების არჩევისა და კომისიების დაკომპლექტების პროცედურაში დღეს მონაწილეობას არ მივიღებთ", — აცხადებს ის.

სიჭინავა აღნიშნავს, რომ იმ მუნიციპალიტეტში, სადაც მათმა პარტიამ ხმების გადამწყვეტი რაოდენობა ვერ, თუმცა თავმჯდომარეობის დასასახელებლად საკმარისი ხმები მოიპოვა, პირველივე სხდომაზე საკუთარ კანდიდატურებს წარადგენენ.

"სხვა მუნიციპალიტეტებში, სადაც არ გვაქვს ხმების საკმარისი რაოდენობა, გადამწყვეტი ხმები, თუმცა გვაქვს ხმების საკმარისი რაოდენობა იმისთვის, რომ დავასახელოთ საკრებულოს თავმჯდომარეობის ჩვენი კანდიდატები, ჩვენ დღესვე ახალარჩეული საკრებულოების პირველივე სხდომაზე წარვადგენთ ჩვენს კანდიდატებს საკრებულოს თავმჯდომარეობის და სხვა პოზიციების დასაკავებლად", — თქვა მან.

რაც შეეხება ბათუმს, გახარიას პარტიაში გუშინ, 2 დეკემბერს განაცხადეს, რომ აქ საკრებულოს პირველ სხდომას არ დაესწრებიან. მათი განმარტებით, ქართულმა ოცნებამ და ნაციონალურმა მოძრაობამ არ მიიღეს შემოთავაზება კომისიების თანაბრად გადანაწილებისა და საკრებულოს თავმჯდომარედ მათი პარტიის მხარდაჭერაზე.

დღეს, 3 დეკემბერს საკრებულოების მეშვიდე მოწვევის პირველი სხდომა გაიმართება, სადაც საკრებულოს თავმჯდომარეებს, მათ მოადგილეებსა და კომისიის წევრებს აირჩევენ.

გაიგე მეტი: