ევროკავშირის გადაწყვეტილებით, საქართველოს თავდაცვის ძალები ევროპული სამშვიდობო ფონდიდან დახმარების სახით 12,75 მილიონ ევროს მიიღებენ, რომელიც 36 თვეზე იქნება განაწილებული.

"ეს დახმარების ღონისძიება ხელს შეუწყობს საქართველოს თავდაცვის ძალების შესაძლებლობების გაძლიერებას, მათ შორის შესაძლებლობას, გაუწიონ მომსახურება მშვიდობიან მოქალაქეებს კრიზისულ ან საგანგებო სიტუაციებში. კერძოდ, ის უზრუნველყოფს არალეტალური სამედიცინო და საინჟინრო აღჭურვილობას და სამოქალაქო ტიპის მობილობის აქტივებს", — აცხადებს ევროპული საბჭო.

ევროპული საბჭოს ინფორმაციით, დახმარებას მიიღებენ უკრაინა, მოლდოვა და მალის რესპუბლიკაც. მათივე განცხადებით, ეს ღონისძიებები მიზნად ისახავს ბენეფიციარი ქვეყნების შესაძლებლობების გაძლიერებას სამხედრო და თავდაცვის საკითხებში, შიდა მდგრადობისა და მშვიდობის ხელშეწყობის მიზნით.