საკუთარ სასამართლო სხდომაზე, ე.წ. პიჯაკების საქმის განხილვაზე სიტყვით გამოსვლისას ექსპრეზიდენტმა განაცხადა, რომ ის არ ითხოვს მადლობას იმის გამო, რაც ქვეყანას გაუკეთა, მაგრამ შეურაცხყოფას და უსამართლობას ვერ მიიღებს. მიხეილ სააკაშვილის თქმით, ვერც იმას მიიღებს მისი სახელის გვერდით სიტყვა კორუფცია ახსენონ, რადგან მისი მმართველობისას ქვეყანამ კორუფცია დაამარცხა.

"არ ვითხოვ მადლობას, სიბნელიდან დენი რომ მოვიყვანეთ და ნავთქურები და გენერატორები დაგვავიწყდა; არ ვითხოვ მადლობას იმისათვის, რომ მათ შორის, ალბათ, ზოგიერთმა მათგანმა [პროკურორმა] ჩვენი სისტემით ჩააბარა და იურიდიულზე 15 ათასს აღარ თხოვდნენ. ზოგიერთი მათგანი, ალბათ, ჩემი სტიპენდიით იყო წასული, როგორც ჩემი მკვლელობის ერთ-ერთი მონაწილე, ე.წ. იუსიტიციის მინისტრი.

ხომ არ ვითხოვ იმას, მადლობა თქვან, რომ პენსიები ათჯერ გაიზარდა, ხელფასები ათჯერ გაიზარდა, სამუშაო ადგილები ორჯერ გაიზარდა, ხომ არ გთხოვთ მადლობას თუნდაც იმ 200 ახალი კლინიკისთვის, სადაც სამწუხაროდ ექიმებს ძალიან მძმე პირობები აქვთ სამუშაოდ, დავრწმუნდი ამ დღეებში; მაგრამ უსამართლობას მე ვერ მივიღებ, შეურაცხყოფას მე ვერ მივიღებ, სააკაშვილთან სიტყვა კორუფციის ხსენებას მე ვერ მივიღებ. იმიტომ, რომ მსოფლიო ბანკმა ერთადერთი შემთვევა იყო, როდესაც გამოაქვეყნა წიგნი კორუფციის დაძლევაზე რომელიმე ქვეყანაში და მხოლოდ ერთმა ქვეყანამ მოახერხა, ეს იყო საქართველო", — განაცხადა მან სასამართლო სხდომაზე.

ამ წუთებში თბილისის საქალაქო სასამართლოში, მოსამართლე ბადრი კოჭლამაზიშვილი ე.წ. პიჯაკების საქმეს განიხილავს. სააკაშვილს ბრალი ედება სამსახურებრივი მდგომარეობის გამოყენებით, წინასწარი შეთანხმებით, პირთა ჯგუფის მიერ დიდი ოდენობით სახელმწიფო ქონების, კერძოდ 9 მილიონ 24 ათას 667 ლარის გაფლანგვაში, რისთვისაც სასჯელის სახით გათვალისწინებულია თავისუფლების აღკვეთა 7-დან 11 წლამდე.

ადვოკატებმა საქმის პროკურორის აცილება მოითხოვეს, რაც მან არ დააკმაყოფილა.

პარალელურად, საქალაქო სასამრთლოსთან ექსპრეზიდენტის მხარდამჭერების აქცია იმართება. ადგილზე მობილიზებულია პოლიცია.