"ბინძურო მატყუარა" — ასე მიმართა ექსპრეზიდენტმა მიხეილ სააკაშვილმა მისი საქმის პროკურორს. ექსპრეზიდენტის გაღიზიანება გამოიწვია პროკურორ არჩილ ტყეშელაშვილის განცხადებამ, რომ სააკაშვილის ხელმძღვანელობის დროს ლოზუნგი იყო: "მეტი დაკავებული, მეტი პრემია".

სააკაშვილის რეპლიკის შემდეგ მოსამართლემ მოუწოდა მხარეებს მეტი პატივისცემა გამოიჩინონ ერთმანეთის მიმართ. გარდა ამისა, მან ისიც მოუწოდა მხარეებს, რომ სამ ხმაში არ ისაუბრონ, რათა გაიგოს რა ხდება, თუმცა სხდომა კამათისა და ყვირილის ფონზე გაგრძელდა.

ამ წუთებში თბილისის საქალაქო სასამართლოში, მოსამართლე ბადრი კოჭლამაზიშვილი ე.წ. პიჯაკების საქმეს განიხილავს. სააკაშვილს ბრალი ედება სამსახურებრივი მდგომარეობის გამოყენებით, წინასწარი შეთანხმებით, პირთა ჯგუფის მიერ დიდი ოდენობით სახელმწიფო ქონების, კერძოდ 9 მილიონ 24 ათას 667 ლარის გაფლანგვაში, რისთვისაც სასჯელის სახით გათვალისწინებულია თავისუფლების აღკვეთა 7-დან 11 წლამდე.

ადვოკატებმა საქმის პროკურორის აცილება მოითხოვეს. ჯერჯერობით ამ შუამდგომლობაზე მოსამართლის პოზიცია უცნობია.

პარალელურად, საქალაქო სასამრთლოსთან ექსპრეზიდენტის მხარდამჭერების აქცია იმართება. ადგილზე მობილიზებულია პოლიცია.