აშშ-ის საკვებისა და მედიკამენტების ადმინისტრაციაში სამშაბათს ექსპერტ-მსაჯულთა ხმის მიცემა გაიმართა, რომლის შედეგადაც კოვიდ-19-ის სამკურნალო პრეპარატის რეკომენდაცია გაიცა. მას "მოლნუპირავირი" ეწოდება და კომპანია Merck-ის მიერ შექმნილი ანტივირუსული პრეპარატია.

გადაწყვეტილება ერთსულოვანი არ გახლდათ და ხმათა რაოდენობაც 13/10-ზე გადანაწილდა, ვინაიდან ზოგიერთმა ექსპერტმა უსაფრთხოებასთან დაკავშირებული რისკებისა და შეზღუდული ეფექტიანობის საკითხი წამოჭრა. საბოლოო ჯამში, ხმის მიცემის შედეგად გადაწყდა, რომ ინფიცირებულ პირებში, რომელთაც სერიოზული დაავადების მაღალი რისკი აქვთ და ხუთი დღეა, რაც სიმპტომები უვითარდებათ, მედიკამენტის მიღების სარგებელი მის რისკებს გადაწონის.

ხმის მიცემაში მონაწილე რამდენიმე პირმა სურვილი გამოთქვა, ავტორიზაციის მიღმა კონკრეტულად ფეხმძიმე ქალები დარჩენილიყვნენ:

"ვფიქრობ, FDA-მ მედიკამენტის გამოყენების ნებართვა ფეხმძიმე ქალებზე არ უნდა გასცეს, განსაკუთრებულ შემთხვევებს თუ არ ჩავთვლით", — განაცხადა გადაწყვეტილების მომხრე დევიდ ისტმენმა, ბიოლოგიის პროფესორმა — "ვფიქრობ, იგი მხოლოდ მაღალ რისკ-ჯგუფში მყოფ პირთათვის უნდა იყოს განკუთვნილი".

სხვებმა კი განაცხადეს, რომ გადაწყვეტილება თავად ორსულებმა უნდა მიიღონ, სამედიცინო მრჩევლის დახმარებით.

ასევე იხილეთ: დიდმა ბრიტანეთმა COVID-19-ის სამკურნალო აბების გამოყენება დაუშვა.

FDA ამ წამალს კვლავაც განიხილავს და ჯერ არ გადაუწყვეტია, მისცეს თუ არა გადაუდებელი გამოყენების ავტორიზაცია. როგორც წესი, სააგენტო ექსპერტთა გუნდის რჩევას მისდევს, თუმცა ეს სავალდებულო მაინც არაა.

Merck-ის კლინიკური ცდის ფარგლებში 1 400-ზე მეტმა აუცრელმა ადამიანმა მიიღო მონაწილეობა. ისინი კოვიდ-19-ით ახალი ინფიცირებულები გახლდნენ და სერიოზული გართულებების მაღალი რისკის წინაშე იმყოფებოდნენ. მოხალისეთა ნაწილს დაახლოებით ხუთი დღის განმავლობაში აძლევდნენ Merck-ის მიერ შექმნილ 40 აბს, საკონტროლო ჯგუფი კი ყალბ წამლებს იღებდა.

საბოლოო ანალიზმა აჩვენა, რომ წამალმა ჰოსპიტალიზაციისა და სიკვდილის მაჩვენებელი 30 პროცენტით შეამცირა, თუმცა აღსანიშნავია ისიც, რომ ოქტომბერში ჩატარებულმა წინასწარმა ანალიზმა 48 პროცენტიანი შემცირება აჩვენა.

FDA-მ ლაბორატორულ და ცხოველებზე ჩატარებული კვლევების მიხედვით უსაფრთხოებასთან დაკავშირებული რამდენიმე შესაძლო რისკიც წამოაყენა: რისკი ნაყოფისათვის, ძვლებისა და ხრტილების ზრდის შეფერხების რისკი და მუტაგენურობა.

ამგვარი საფრთხეები იქიდან მომდინარეობს, რომ წამალი ნუკლეოზიდია, ვირუსის საწინააღმდეგო საშუალება, რომელიც მისი გამრავლების პროცესში განზრახ იწვევს შეფერხებებს და ვირუსის თვითგამრავლების პროცესს აბრკოლებს. არსებობს რისკი, რომ იგი ადამიანის უჯრედებთანაც შევიდეს ურთიერთქმედებაში და მათში მუტაციები გამოიწვიოს.

მეცნიერები სწორედ ამ რისკის სერიოზულობის საკითხს განიხილავენ. ნებართვის შემთხვევაში მოლნუპურავირი კოვიდ-19-ის სამკურნალო პირველი აბი იქნება, რომელიც პაციენტებისათვის სამედიცინო დახმარების მიღებას გაამარტივებს.

თუ სტატიაში განხილული თემა და ზოგადად: მეცნიერებისა და ტექნოლოგიების სფერო შენთვის საინტერესოა, შემოგვიერთდი ჯგუფში – შემდეგი ჯგუფი.