მთაწმინდის რაიონის პოლიციის ხელმძღვანელის, გოგა მემანიშვილის განცხადებით, წიწაკის სპრეი "არ უნახავს" და არ იცის გამოიყენეს თუ არა. როგორც მან მთავარ არხს განუცხადა, საპატრულო პოლიციის თანამშრომლებს წიწაკის სპრეი არ აქვთ.

"არ ვიცი ვერ გეტყვით, არ მინახავს. გზიდან გადაიწიეთ, მე ვმუშაობ, ხელს ნუ მიშლით. ვინ გამოიყენა? საპატრულო პოლიციის თანამშრომლებს არ აქვთ ეგ. არ ვიცი, არ ვიცი [ვინ გამოიყენა]", — ეუბნება მემანიშვილი მთავარი არხის ჟურნალისტს.

თბილისის საქალაქო სასამართლოსთან, სავარაუდოდ, წიწაკის სპრეი გამოიყენეს. ადგილზე იყო დაპირისპირება აქციის მონაწილეებსა და სამართალდამცავებს შორის, რა დროსაც რამდენიმე პირი შეუძლოდ გახდა, მათ შორის ოპერატორები. ადგილზე მყოფები ჟურნალისტებთან ამბობენ, რომ პოლიციამ სპრეი შეასხა, მათ უჭირთ სუნთქვა და სტკივათ თვალები.

შინაგან საქმეთა სამინისტრომ აქციის მონაწილეების დაკავებები დაიწყო. ამ დროისათვის უცნობია, რამდენი ადამიანი დაკავებული აღმაშენებლის გამზირზე. გოგა მემანიშვილის განცხადებით, მათ ადმინისტრაციული წესით 173-ე მუხლით აკავებენ, რაც პოლიციელის კანონიერი მოთხოვნისადმი დაუმორჩილებლობას გულისხმობს. ამ მუხლით დააკავეს ოპოზიციონერი გიგი უგულავაც.

მიხეილ სააკაშვილი დღეს თავის სასამართლო პროცესს ესწრება. დღეს სასამართლო 7 ნოემბრის საქმეზე მსჯელობს. სააკაშვილის პროცესის პარალელურად ოპოზიციამ აქცია დააანონსა. იქამდე, კი თავად ექსპრეზიდენტმა მოუწოდა მხარდამჭერებს ამ დღეს შეკრებისკენ.

ამ სხდომამდე სააკაშვილს სამჯერ უთხრეს უარი საკუთარ პროცესზე დასწრებაზე, მიზეზად იუსტიციის სამინისტრო მისი ჯანმრთელობის მდგომარეობას და უსაფრთხოებას ასახელებდა. საერთაშორისო პარტნიორები, უფლებადამცველები, ომბუდსმენი, ელჩები და არასამთავრობო ორგანიზაციები აცხადებდნენ, რომ სააკაშვილს არ უნდა შეეზღუდოს საკუთარ სხდომაზე დასწრების უფლება.

22 ნოემბერს იუსტიციის მინისტრმა განაცხადა, რომ ვინაიდან ექსპრეზიდენტმა შიმშილობა შეწყვიტა, გამოირიცხა ერთი ფაქტორი, რომლის გამოც ის სასამართლოში არ მიჰყავდათ. მისივე თქმით, ექიმების შესაბამისი დასკვნის შემთხვევაში, შესაძლებელი იქნებოდა, ის შემდგომ სასამართლო პროცესზე დარბაზში მიეყვანათ.