შინაგან საქმეთა სამინისტროს ცნობით, პოლიციის კანონიერი მოთხოვნისადმი დაუმორჩილებლობის სამართალდარღვევაზე პოლიციამ ზუგდიდში 2 პირი, ხოლო ბათუმში 4 პირი ადმინისტრაციული წესით დააკავა. უწყების განცხადებით, შსს-ს თანამშრომლები მიმდინარე აქციებთან დაკავშირებით მობილიზებული რჩებიან და საზოგადოებრივ წესრიგს დაიცავენ.

"შსს, როგორც მართლწესრიგის დაცვაზე პასუხისმგებელი უწყება, მოუწოდებს აქციის ორგანიზატორებს, პოლიტიკურ ლიდერებს და შეკრებილ მოქალაქეებს — შეკრებისა და გამოხატვის დროს დაიცვან კანონის მოთხოვნები და დაემორჩილონ პოლიციელთა კანონიერ მოთხოვნებს. წინააღმდეგ შემთხვევაში, პოლიცია იმოქმედებს საკუთარი მანდატის ფარგლებში და სამართალდარღვევის თითოეული ფაქტი დაუყოვნებლივ იქნება აღკვეთილი", — ნათქვამია განცხადებაში.

დილიდან ხმაური იყო ბათუმისა და ზუგდიდის საკრებულოსთან, სადაც 2022 წლის ბიუჯეტს ამტკიცებდნენ. ოპოზიციის პროტესტის მიუხედავად, ბათუმისა და ზუგდიდის საკრებულოს ძველმა შემადგენლობამ მუნიციპალიტეტის ბიუჯეტი დაამტკიცა.

ბიუჯეტის მიღებას ოპოზიციონერი დეპუტატები ეწინააღმდეგებოდნენ. ოპოზიციის განცხადებით, მომავალი წლის ბიუჯეტი საკრებულოს ახალ შემადგენლობას უნდა დაემტკიცებინა. მათივე თქმით, საკრებულოს არსებული შემადგენლობა არალეგიტიმურია და მათ ბიუჯეტის დამტკიცების უფლება არ ჰქონდათ.

გაიგე მეტი: