სახალხო დამცველის ინიციატივით შექმნილი ექსპერტთა ჯგუფის წევრები გორის სამხედრო ჰოსპიტალში, ექსპრეზიდენტ მიხეილ სააკაშვილის სანახავად 23 ნოემბერს იმყოფებოდნენ. ეს ამ კონსილიუმის მესამე შეხვედრაა ექსპრეზიდენტთან. ისინი პირადად გაესაუბრნენ მიხეილ სააკაშვილს და დაასკვნეს, რომ მისი სასიცოცხლო პარამეტრები ნორმის ფარგლებშია. ექიმები პაციენტის მდგომარეობას სტაბილურად აფასებენ, თუმცა აღნიშნავენ, რომ კვლავ შეინიშნება სისუსტე და წონასწორობის დარღვევა.

ექსპერტთა ჯგუფის მიერ გამოკვეთილი ძირითადი პრობლემებია:

• ფოსფატის დონის შეფარდებითი ვარდნა სისხლში.

ექსპერტთა ჯგუფის ინფორმაციით, ფოსფატის დონე სისხლში 3მმოლ/ლ-დან (რამდენიმე დღის წინ) 1,08 მმოლ/ლ-ამდეა შემცირებული. მათი თქმით, ეს გულისხმობს "პროგნოზირებულ რეფიდინგის სინდრომს და ითხოვს ფოსფორის, ასევე სხვა ელექტროლიტების ხშირ მონიტორინგსა და საჭიროებისამებრ შევსებას".

• ვერნიკეს ენცეფალოპათია ამ ეტაპზე არ პროგრესირებს.

"გორის ჰოსპიტალში გადმოყვანის, კვების დაწყებისა და თიამინის ინტენსიური შევსების შემდეგ, კრუნჩხვით აქტივობას ადგილი აღარ ჰქონია და პაციენტის მდგომარეობა კლინიკურად დასტაბილურდა", — ვკითხულობთ ექსპერტთა ჯგუფის დასკვნაში.

ისინი აღნიშნავენ, რომ ჩატარებული თავის კტ კვლევა დასკვნის მიხედვით რაიმე აბნორმალურს არ მიუთითებს. რაც შეეხება მაგნიტურ რეზონანსულ ტომოგრაფიას, ექიმების განცხადებით, პაციენტის მდგომარეობის დასტაბილურებიდან გამომდინარე, კვლევის გადაუდებელი ჩატარება ამ ეტაპზე აუცილებელი აღარაა.

"ვერნიკეს ენცეფალოპათიის პროგნოზის მხრივ, მზერის პარეზი მოსალოდნელია რომ მალევე აღდგეს, ვესტიბულური დისფუნქცია 2 კვირის განმავლობაში გაუმჯობესდეს. თუმცა, დაბნეულობა და სისუსტე რამდენიმე კვირა შეიძლება გაგრძელდეს. არ არის გამორიცხული, რომ მზერის პარეზის სრული აღდგენა არ მოხდეს", — წერია დასკვნაში.

• ექსპერტთა ჯგუფის რეკომენდაციით, შესაბამისი დიაგნოზის დასმის, ფსიქოთერაპიის კურსისა, ფარმაკოლოგიური მკურნალობის განსაზღვრისა და რეაბილიტაციის პროცესის ადეკვატურად წარმართვისთვის მკურნალობის პროცესში მაღალკვალიფიციური სპეციალისტები უნდა ჩაერთონ.
• ვიტამინების დეფიციტისათვის უნდა გაგრძელდეს მულტივიტამინები.
• საჭიროა ფიზიკური რეაბილიტაცია.

სახალხო დამცველის აპარატის ინფორმაციით, გორის სამხედრო ჰოსპიტალში იმყოფებოდნენ: აიდა გოზალოვა, თენგიზ წულაძე, გიორგი კაჭარავა, ნინო ზავრაშვილი, გრიგოლ ხურციძე, გიორგი პაპიაშვილი. ვიზიტის შემდგომ გამართულ დისტანციურ დისკუსიაში მონაწილეობა მიიღეს მამუკა მაჩაიძემ და გიორგი გრიგოლიამ.

მიხეილ სააკაშვილი გორის სამხედრო ჰოსპიტალში მე-6 დღეა იმყოფება. იქ გადაყვანა იუსტიციის სამინისტრომ 19 ნოემბერს შესთავაზა, რასაც ექსპრეზიდენტი დათანხმდა და 50-დღიანი შიმშილობა შეწყვიტა.

გუშინ, 24 ნოემბერს, სახელმწიფო კონსილიუმის წევრმა და ენდოკრინოლოგმა, ელენე გიორგაძემ განაცხადა, რომ ექსპრეზიდენტის მკურნალობა გეგმის მიხედვით მიდის და მისი მდგომარეობა ნელ-ნელა უმჯობესდება. მისი თქმით, სააკაშვილს დღეს დილით სიარულის პირველი მცდელობა ჰქონდა, რაც ცოტა გაუჭირდა, თუმცა საღამოს 5 წუთის განმავლობაში დერეფანში გავლა შეძლო. ამასთა, უკრაინელმა დეპუტატმა, ლიზა იასკომ განაცხადა, რომ ექსპრეზიდენტმა გორის სამხედრო ჰოსპიტალში გადაყვანის შემდეგ 3 კილო დაიკლო და ის კიდევ უფრო სუსტადაა, ვიდრე წინა დღეებში. მისი თქმით, პოსტრამვულ პერიოდში სააკაშვილს სუფთა ჰაერის სუნთქვის საშუალება არ ეძლევა, რაც ცუდია.