მართალია, ბალიშებით ჩხუბი ჩვენს დედმამიშვილებთან ერთად საძინებელში ხშირად გაგვიმართავს, მაგრამ ეს შეჯიბრი უკვე რინგზე გადადის და 2022 წლის 29 იანვარს აშშ-ის შტატ ფლორიდაში ბალიშებით ბრძოლის ჩემპიონატი გაიმართება.

თუმცა ბალიშებით ჩხუბის შესახებ ჩვენი მხიარული მოგონებები უნდა დავივიწყოთ, რადგან ჩემპიონატის ორგანიზატორები გვაფრთხილებენ, რომ ეს ნამდვილი საბრძოლო შეჯიბრი იქნება.

ფოტო: Reuters

"ბალიშებით ჩხუბი აღარ არის იმის მსგავსი, რომ ზიხარ, იცინი და ირგვლივ ბუმბული დაფრინავს. არამედ ეს რთული ბრძოლაა, რომელშიც სპეციალური ბალიშები იქნება გამოყენებული", — ამბობს ჩემპიონატის აღმასრულებელი დირექტორი.

მიუხედავად იმისა, რომ იანვრის შეჯიბრში მონაწილე კაცები და ქალები კრივის რთულ სამყაროსა და მის წესებს შეუერთდებიან, ბავშვები თუ ორთაბრძოლას ნახავენ, მაინც მშვიდად დაეძინებათ, რადგან აქ სისხლს, ძალადობასა და მონაწილეების დაშავებას ადგილი არ ექნება.

იმ ფაქტის გათვალისწინებით, რომ ბავშვობიდან ბალიშებით ჩხუბი მრავალი ჩვენგანისთვის ნაცნობი, სახალისო და ნოსტალგიური თავშესაქცევია, შეჯიბრის ორგანიზატორები ფიქრობენ, რომ ჩემპიონატს ბევრი მაყურებელი ეყოლება.

ბალიშებით ბრძოლა სამი რაუნდისგან შედგება და მსურველებს მისი ნახვა სპორტულ პლატფორმა FITE-ზე შეეძლებათ.