პარლამენტის პირველი ვიცე-სპიკერი, გია ვოლსკი აცხადებს, პრემიერმინისტრ ირაკლი ღარიბაშვილს ქართუ ჯგუფში მუშაობის პერიოდში ფინანსურ საკითხებთან დაკავშირებით კომპეტენცია ნამდვილად არ ჰქონდა. ასე გამოეხმაურა ის ქართული ოცნების დამფუძნებლის, ბიძინა ივანიშვილის განცხადებას ღარიბაშვილის ფინანსური და იურიდიული კომპეტენციების შესახებ. ვოლსკის მტკიცებით, ივანიშვილმა ბერმუდის სასამართლოში ჩვენების მიცემისას არა ღარიბაშვილის პიროვნება, არამედ საქმიანობა დაახასიათა.

"ვადასტურებ იმას, რომ არანაირი კომპეტენცია იმ პერიოდში არ გააჩნდა იმ ფინანსურ საკითხებთან დაკავშირებით, რომელზეც საუბრობდა ბიძინა ივანიშვილი და აძლევდა ჩვენებას სასამართლოს. რასაკვირველია, მე არ ვიცი რამ წარმოშვა ეგ საკითხი, მაგრამ დახასიათება იმ პერიოდის, ირაკლი ღარიბაშვილის საქმიანობისა და არა მისი პიროვნებისა, ზუსტად ეგ არის, რომ მას არანაირად ხელი არ მიუწვდებოდა იმ საკითხებზე, რაზეც სასამართლოშია საუბარი", — თქვა მან.

ფორმულამ გაავრცელა ვიდეო, სადაც ჩანს, რომ ქართული ოცნების დამფუძნებელი ბიძინა ივანიშვილი, რომელიც ბერმუდის სასამართლოში ჩვენებას დისტანციურად აძლევდა, პრემიერმინისტრ ირაკლი ღარიბაშვილზე ამბობს, რომ ის მისთვის ავტორიტეტს არ წარმოადგენდა. ტელეკომპანიის ინფორმაციით, შვეიცარიული ბანკის იურისტმა ივანიშვილს ბევრჯერ ჰკითხა ხელშეკრულების გაფორმებისას რა როლი ჰქონდა ირაკლი ღარიბაშვილს, რომელიც ივანიშვილისა და ბანკის წარმომადგენლების ყველა შეხვედრას ესწრებოდა.

ვიდეოში ივანიშვილი, ასევე, ირწმუნება, რომ პოლიტიკაში ყოფნის დროს, რაც მოსახლეობას დაპირდა, შეასრულა.