სალხინოში, სოფელ წაჩხურუში ცაგერის, ლენტეხისა და ჭყონდიდის მიტროპოლიტ სტეფანე კალაიჯიშვილის გამოჩენას დაძაბულობა მოჰყვა. მამათა მონასტრის ეზოში შეკრებილები არიან როგორც თავად მიტროპოლიტის მრევლი, ისე მის მიერ ჭყონდიდის ეპარქიიდან განკვეთილი ბერები და მათი მხარდამჭერები.

"მრუშო", "მონებო", "მოძალადე" — ამ შეძახილებით შეხვდა მიტროპოლიტ სტეფანესა და მის თანმხლებ პირებს მამათა მონასტრის ეზოში შეკრებილი მრევლი.

"მატყუარა კაცი არის ახლა შესული იქ, სტეფანე კალაიჯიშვილი არის მატყუარა, ცრუ და მისი შეწირული რაფერ შეიძლება იყოს რამე", — აცხადებს ერთ-ერთი განკვეთილი სასულიერო პირი, მამა ათინოგენი.

ადგილზე მობილიზებულია პოლიცია.

ფოტო: კადრი ვიდეოდან/იმედი

ჭყონდიდის ეპარქიაში დაძაბულობა აქამდეც არაერთხელ ყოფილა. 7 ნოემბერს, მას შემდეგ, რაც მიტროპოლიტმა სტეფანემ ქადაგებისას, მის მიერ განკვეთილ სასულიერო პირებზე საუბრისას თქვა, რომ მონასტერი "ავაზაკთა კრებულისგან" გათავისუფლდა, ადგილზე დაპირისპირება დაიწყო. დაპირისპირებისას სულ 7 ადამიანი დააკავეს, 6 — ადმინისტრაციული წესით, 1 — პოლიციელზე თავდასხმისთვის.

19 სექტემბერს მეუფე სტეფანემ მასთან დაპირისპირებული 6 სასულიერო პირი ეკლესიიდან განკვეთა. ბერებმა მონასტრის დატოვებაზე უარი თქვეს და ადგილზე რჩებოდნენ. 3 ნოემბერს მათ საპატრიარქოსგან წერილი მიიღეს, რომ 4 ნოემბრამდე შეეწყვიტათ "საეკლესიო ქონებით უკანონოდ სარგებლობა და განკარგვა". წერილს ხელს პატრიარქის მდივანი, მიქაელ ბოტკოველი აწერდა. ბერებმა ისევ უარი თქვეს ტერიტორიიდან გასვლაზე.

მომდევნო დღეებში ისინი მონასტერში აღარ შეუშვეს, რასაც დაპირისპირება და ხმაური მოყვა. ადგილზე მობილიზებული იყო პოლიციაც.

მეუფე სტეფანე ამბობს, რომ ვისაც სჭირდება თავშესაფარი, მისცემს ცაგერისა და ლენტეხის ეპარქიაში, მაგრამ არა ჭყონდიდში. მამა ათინოგენი კი პასუხად აცხადებს, რომ არ მოსცილდებიან იმ ადგილს, სანამ მონასტერში არ შებრუნდებიან.