საქართველოს სახალხო დამცველი, უჩა ნანუაშვილი მიიჩნევს, რომ საქართველოში განსაკუთრებით მძიმე მდგომარეობაში, უფლებების დაცვის კუთხით, ლგბტ თემის წარმომადგენლები არიან. ამის შესახებ სახალხო დამცველმა თავის ყოველწლიურ ანგარიშში ასახა.

"არსებული ჰომოფობიური და ტრანსფობიური განწყობების საპასუხოდ, სახელმწიფოს მიერ, ლგბტ პირთა უფლებრივი მდგომარეობის გასაუმჯობესებლად გადადგმული ნაბიჯები კვლავ მინიმალურია და ფორმალურ ხასიათს ატარებს. სამწუხაროდ, ლგბტ ადამიანები ვერ ქმნიან საკუთარ უფლებრივ და სამართლებრივ მდგომარეობასთან დაკავშირებულ დღის წესრიგს," - ვკითხულობთ ანგარიშში.

სახალხო დამცველს მნიშვნელოვანად მიაჩნია, რომ სახელმწიფო ხელისუფლების ორგანოებმა, მაქსიმალურად შეუწყონ ხელი სიძულვილით განპირობებული ძალადობრივი ქმედებების პრევენციასა და ჰომოფობიური გამოვლინებების აღკვეთასა და ლგბტ ადამიანების კონსტიტუციით გარანტირებული უფლებების და თავისუფლებების უპირობო განხორციელებას.