ქართული ოცნების დეპუტატიs, შალვა პაპუაშვილის განცხადებით, უმჯობესი იქნებოდა, სახალხო დამცველის მიერ შექმნილ ჯგუფს ექსპრეზიდენტისთვის, შიმშილობის შეწყვეტა მოეწოდებინათ, ნაცვლად იმისა, რომ ემსჯელათ იმაზე შიმშილობის პერიოდში როგორ იმართოს. ამასთან, მან აღნიშნა, რომ დროას ლიდერი ელენე ხოშტარია სწორედ სააკაშვილის გამო შიმშილობს.

"ზოგადად, მათ შორის, ამ ჯგუფსაც რომ მოეწოდებინა, კიდევ ერთხელ მიხეილ სააკაშვილისთვის, რომ შეეწყვიტა შიმშილობა, კარგი იქნებოდა, ნაცვლად იმისა, რომ ემსჯელათ იმაზე, შიმშილობის პერიოდში როგორ იმართოს. ექიმებისგანაც კარგი იქნებოდა მოწოდება, მაგრამ სახალხო დამცველისგანაც, მათ შორის. მით უმეტეს, რომ ჩვენ ვიცით, რომ ელენე ხოშტარია, რომელიც შიმშილობს პარლამენტის შენობაში, მისი მდგომარეობა ნამდვილად რთულია და ერთადერთი ადამიანი, ვის გამოც შიმშილობს ელენ ხოშტარია, გახლავთ მიხეილ სააკაშვილი", — თქვა პაპუაშვილმა.

გუშინ 17 ნოემბერს სახალხო დამცველის მიერ შექმნილმა ექიმების კონსილიუმმა მიხეილ სააკაშვილის ჯანმრთელობის მდგომარეობაზე დასკვნა გამოაქვეყნა. მათი შეფასებით, ექსპრეზიდენტის მდგომარეობა კრიტიკულია და მკურნალობის გაგრძელება რეკომენდებულია ფუნქციურად გამართულ, დიდი გამოცდილების მქონე პოლიპროფილურ ჰოსპიტალში. ექიმების დასკვნის მიხედვით, ამ პირობებს მე-18 დაწესებულების კლინიკა არ აკმაყოფილებს.

სააკაშვილი 49-ე დღეა შიმშილობს. როგორც მისმა ექიმიმმა, ნიკოლოზ ყიფშიძემ გუშინ თქვა, ექსპრეზიდენტი მძიმედ გადაადგილდება, რის გამოც სააკაშვილი პაემნების ოთახში ვერ ჩავიდა და მის სანახავად პალატაში მოუწია ასვლა.