თბილისის მერის, კახა კალაძის განცხადებით, მიხეილ სააკაშვილის კადრები, რომელიც პენიტენციურმა სამსახურმა გაავრცელა "მოთხოვნილი იყო ჟურნალისტების მხრიდან". ასე პასუხობს ის მედიის წარმომადგენლის კითხვას, გმობს თუ არა გავრცელებულ კადრებს.

"პატიმარი არის ყველა პატიმარი, ეს არიან ადამიანები, ვინც ჩადიან დანაშაულს, არ ვიცი ახლა, განსაკუთრებული, არაგანსაკუთრებული, ადამიანს აქვს დანაშაული ჩადენილი [...] ეს კადრები მოთხოვნილი იყო, პირველ რიგში, თქვენი მხრიდან, ჟურნალისტების მხრიდან, ნაჩვენები და გაჟღერებული ყოფილიყო, შესაბამისად, შესაბამისმა სამსახურმა გაავრცელა ეს კადრები", — განაცხადა მან.

მიხეილ სააკაშვილი პირველ ოქტომბერს, მას შემდეგ დააკავეს, რაც თავადვე გაავრცელა ინფორმაცია, რომ საქართველოში იმყოფება. ის 48-ე დღეა შიმშილობს. ადვოკატები, პირადი ექიმი, არასამთავრობო ორგანიზაციების ნაწილი და ოპოზიცია მის სამოქალაქო კლინიკაში გადაყვანას ითხოვენ, თუმცა ხელისუფლება უარზეა. 8 ნოემბერს ექსპრეზიდენტი გლდანის ციხის სამკურნალო დაწესებულებაში გადაიყვანეს. მოგვიანებით პენიტენციურმა სამსახურმა გაავრცელა კადრები, სადაც ჩანს, რომ ის შენობაში ძალის გამოყენებით შეჰყავთ.

მას შემდეგ, რაც სტრასბურგის სასამართლომ მიხეილ სააკაშვილს შიმშილობის შეწყვეტისკენ მოუწოდა, ხოლო მთავრობას დაავალა აცნობოს მისი ჯანმრთელობის მდგომარეობის შესახებ და უზრუნველყოს მკურნალობა შიმშილობის შემდეგ, ექსპრეზიდენტმა განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.

დღეს პრეზიდენტმა ბრიფინგი გამართა, სადაც კატეგორიულად მიუღებელი უწოდა სააკაშვილის ღირსებისა და პატივის შემლახავი კადრების გავრცელებას და მმართველი გუნდის რიტორიკა გააკრიტიკა. მისი თქმით, ზოგიერთი ოფიციალური პირის გაკეთებული გამომწვევი განცხადებები საზოგადოებაში მეტ გაუგებრობას, დაძაბულობასა და გაღიზიანებას იწვევს და ამ ვითარებაში კომენტარები მოზომილი უნდა იყოს.

ზურაბიშვილმა სამწუხაროდ შეაფასა ის, რომ ექსპრეზიდენტ მიხეილ სააკაშვილის ჯანმრთელობის მდგომარეობის გამო შექმნილ კონსილიუმს მუშაობის გაგრძელების შესაძლებლობა არ მიეცა.

გაიგეთ მეტი: